Qoraqalpog‘istonda pora evaziga baliq yetishtirish ko‘lini sotmoqchi bo‘lgan shaxs ushlandi

Qoraqalpog‘istonda baliq yetishtirish ko‘lini sotmoqchi bo‘lgan shaxs qo‘lga olingan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Ma’lum bo‘lishicha, departamentning Qoraqalpog‘iston Respublikasi boshqarmasi hamda DXX hamkorlikda tezkor tadbir o‘tkazgan.

Unda X.Q. “Sh.” fermer xo‘jaligining baliq yetishtirishga mo‘ljallangan 200 gektar yer maydoni hamda baliq saqlash ko‘lini tanishlari orqali rasmiylashtirib berishi evaziga 250 mln so‘mni olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Bundan oldin Qo‘ng‘irotda mahkumni 10 ming dollar evaziga ozodlikka chiqarib bermoqchi bo‘lgan firibgar ushlangandi.