Rossiya qamaldagi shaharlarda gumanitar yo‘laklar taklif qildi. Yo‘laklar Rossiya va Belarusga olib boradi

Rossiya harbiylari «sukunat rejimi»ni e’lon qilib, Kiyev, Xarkov, Sumi hamda Mariupoldan tinch aholining chiqib ketishi uchun gumanitar yo‘laklar ochmoqda. Bu haqda RF mudofaa vazirligi ma’lum qilgan.

«Sukunat rejimi» 7 mart kuni soat 10:00 dan e’lon qilinadi. Gumanitar yo‘laklar «halokatli gumanitar vaziyat» hisobga olingan holda hamda Fransiya prezidenti Emmanuel Makronning Rossiya prezidenti Vladimir Putindan shaxsiy iltimosi sabab ochilmoqda.

RIA Novosti agentligi e’lon qilgan xaritalar va Rossiyaning «Zvezda» telekanali ma’lumotiga ko‘ra, Rossiya oltita gumanitar koridor ochishga qaror qilgan, ammo shundan to‘rttasi Rossiya va Belarusga olib boradi.

Ukraina hukumati vitse-premeri Irina Vereshchuk Rossiyaning gumanitar yo‘laklar variantini qabul qilib bo‘lmasligini aytdi. «Odamlarimiz Ivankov, Dimer, Vishgorod [Kiyev oblasti] va Kiyev atrofidan keyin samolyotlarda Rossiyaga uchish uchun Belarusga bormaydi», dedi u.

• 5 mart kuni RF mudofaa vazirligi «sukunat rejimi» va rossiyalik harbiylar tomonidan qamal qilingan, og‘ir gumanitar vaziyat yuzaga kelgan Mariupol hamda Volnovaxadan tinch aholining olib chiqilishi uchun gumanitar yo‘laklar ochilishini e’lon qildi. Ammo bu yo‘laklar orqali aholi ommaviy evakuatsiya qilinishi boshlanmadi. Rossiya va Ukraina tomonlari bunda bir-birini ayblamoqda.