Samarqand aeroportida yashirincha xorijga olib chiqilayotgan qadimiy haykalcha to‘xtatib qolindi

Viloyat bojxona boshqarmasi axborot xizmatining Kun.uz’ga xabar berishicha, Samarqand-Moskva yo‘nalishida uchib ketmoqchi bo‘lgan fuqaro I.X. yashil yo‘lak orqali bojxona nazoratidan o‘tayotganida, unga tegishli bagaj sumkasidan qadimiy ashyo topilgan.

Dastlabki surishtiruvda fuqaroning sumkasidagi buyum O‘zbekistondan olib chiqish uchun maxsus ruxsatnoma talab etiladigan qadimiy haykalcha ekani aniqlangan.

Viloyat madaniy meros boshqarmasi haykalcha XIX asrning ikkinchi yarmi XX asr birinchi yarmida yaratilgani va u madaniy boyliklar sirasiga kirishi haqida xulosa bergan.

Qayd etilishicha, haykalchani O‘zbekiston hududidan chiqib ketishi oldi olinib, o‘rnatilgan tartibda Samarqand davlat muzey-qo‘riqxonasiga topshirilgan.

Avvalroq Sirdaryo viloyatida noqonuniy ravishda olib o‘tilayotgan XI–XIII asrlarga oid madaniy boyliklar to‘xtatib qolingandi.