Fiat Chrysler zararli gazlar ko‘rsatkichi bilan bog‘liq hiyla uchun 300 mln dollar to‘laydi

Fiat Chrysler avtomobil ishlab chiqaruvchi konserni AQShda avtomobildan chiqariladigan zararli gazlar to‘g‘risidagi ma’lumotni kamaytirib ko‘rsatgani bo‘yicha ish yuzasidan taxminan 300 mln dollar to‘laydi. 1 avgust, dushanba kuni Detroyt federal sudi uni zararli gazlar ko‘rsatkichi bo‘yicha firibgarlikda aybdor deb topdi hamda uni tovon puli to‘lash, shuningdek, uch yillik sinov muddatiga hukm qildi, deb xabar berdi AQSh Adliya vazirligi. 

Shu tariqa, sud Stellantis xalqaro avtomobil guruhi tuzilmasiga kiruvchi konsernning AQSh Adliya vazirligi bilan iyun oyida o‘z aybiga iqror bo‘lgani holda tuzgan kelishuvini ma’qulladi. AQSh rasmiylari Fiat Chrysler’ni 100 mingdan ortiq dizel dvigatelli avtomobillarga zararli gazlar ko‘rsatkichini kamaytirib ko‘rsatadigan dasturiy ta’minot o‘rnatganlikda ayblagan. Gap Jeep Grand Cherokee va Ram 2014, 2015, 2016 yilgi modellari haqida bormoqda. 

2017 yilda AQSh Adliya vazirligi bu ish bo‘yicha rasmiy ayblov e’lon qildi. O‘z navbatida, konsern rahbariyati aybini va Volkswagen atrofida avvalroq yuzaga kelgan mojaro bilan o‘xshash jihatlarni rad etdi. Biroq, 2019 yilda Fiat Chrysler AQShda fuqarolik da’volari bo‘yicha yuzlab million dollar to‘lashga majbur bo‘ldi.

Avvalroq xuddi shunday janjal Germaniya avtomobilsozlik sanoatida ham kuzatilgan edi. Volkswagen avtomobil ishlab chiqaruvchisi 2015 yil sentabrida AQSh hukumati tomonidan boshlangan tekshiruvlar natijasida dunyoda sotilgan bir necha million avtomobilga dvigatelning ekologik standartlari sinovlarini manipulyatsiya qilishga imkon beruvchi dasturiy ta’minot o‘rnatganini tan olishga majbur bo‘ldi. «Dizelgeyt» texnik soxtalashtirishlarni bartaraf etish uchun VW mahsulotlarini AQSh bozoridan ommaviy ravishda chaqirib olishga sabab bo‘ldi. Konsern Qo‘shma Shtatlar rasmiylari bilan mojaroni bartaraf etish doirasida ko‘p milliard dollarlik jarimalar va tovon puli to‘lash bo‘yicha kelishuvga erishdi. 

Keyinchalik Volkswagen Germaniya va Yevropaning boshqa mamlakatlari, shuningdek, Avstraliyada tovon puli to‘lashga hukm qilindi. Bundan tashqari, bir qator boshqa avtomobil ishlab chiqaruvchilar, jumladan, BMW va Opel ham dizel yonilg‘isidan chiquvchi zararli gazlar to‘g‘risidagi ma’lumotlarni manipulyatsiya qilishda aybdor deb topildi.