Rossiyada Xitoy va Hindiston ishtirokidagi «Vostok-2022» mashqlari boshlandi

Rossiyada «Vostok-2022» strategik qo‘mondonlik-shtab o‘quv mashg‘ulotlari (SQShM) boshlandi, unda 50 mingdan ortiq harbiy xizmatchi, shuningdek, 5 mingdan ortiq qurol va harbiy texnika ishtirok etadi. Rossiya Mudofaa vazirligining 1 sentabr, payshanba kuni xabar berishicha, gap Sharqiy harbiy okrugning yetti poligonida, shuningdek, Oxota va Yapon dengizlari suvlari hamda sohilbo‘yi zonalarida «mudofaa va hujumkor harakatlarni ishlab chiqish» haqida ketmoqda. Mashqlarda 140 ta samolyot, 60 ta harbiy kema, qayiq va yordamchi kemalar ishtirok etadi.

Tinch okean flotining kemalari allaqachon dengizda joylashishni boshlagan. Yapon dengizi va Kamchatka yarimorolining sharqida kemaga, havo hujumiga va suvosti kemalariga qarshi mudofaani tashkil etish vazifalari hal qilinmoqda. 

Yapon dengizi suvlarida Tinch okean floti va XXR harbiy-dengiz kuchlari guruhlari dengiz yo‘llari va dengiz iqtisodiy faoliyati hududlarini himoya qilish hamda quruqlikdagi qo‘shinlarga qirg‘oq yo‘nalishida yordam berish uchun qo‘shma amaliy harakatlarni amalga oshiradi.

Bundan tashqari, Uzoq Sharq orollari zonasida va Kamchatka yarimoroli yaqinida raketa hamda artilleriya o‘qlari bilan dushman kema guruhlari va dengiz desanti kuchlarini mag‘lub etish mashq qilinadi. 

Mashqlarni Kollektiv xavfsizlik shartnomasi tashkiloti (KXShT), Shanhay hamkorlik tashkiloti (ShHT) va boshqa hamkor davlatlar, jumladan, Ozarboyjon, Belarus, Hindiston, Qozog‘iston, Qirg‘iziston, Mo‘g‘uliston va Tojikiston ekspertlari kuzatmoqda. Dpa agentligi ta’kidlashicha, Xitoy va Hindistonning ishtiroki G‘arbning alohida e’tiborini tortdi. 

Mashg‘ulotlar 7 sentabrga qadar davom etadi.