Toshkentda 3 ta avtomobil ishtirokida YTH sodir bo‘ldi

Poytaxtning Olmazor tumanida uch avtomobil ishtirokida yo‘l-transport hodisasi ro‘y berishi oqibatida yo‘lovchilardan biri shifoxonaga yotqizildi.

Foto: Toshkent shahar IIBB YHXB

Toshkent shahar IIBB YHXB Olmazor tumanida sodir bo‘lgan YTH yuzasidan ma’lumot berdi.

«Bugun, 2022 yil 12 dekabr kuni soat 12:00 larda Toshkent shahar, Olmazor tumani, Farobiy ko‘chasida haydovchi, 1972 yilda tug‘ilgan T.K. Captiva rusumli avtomobilda harakatlanayotib, oraliq masofani saqlamagani oqibatida haydovchi, 1977 yilda tug‘ilgan Sh.K. boshqaruvidagi Cobalt hamda haydovchi, 1974 yilda tug‘ilgan M.A. boshqaruvidagi Spark rusumli avtomobillarga to‘qnashgan», deyiladi xabarda.

Hodisa natijasida Spark avtomobili yo‘lovchisi M.R. tan jarohati bilan shifoxonaga olib ketilgan.

Mazkur YTH yuzasidan Toshkent shahar IIBB JXX YHXB xodimlari tomonidan surishtiruv harakatlari olib borilmoqda.