Energetika vazirligi gaz jihozlaridan foydalanish qoidalariga rioya qilishni so‘radi

Vazirlik xabariga ko‘ra, isitish mavsumi boshlanishidan oldin binoning mo‘ri va havo almashish yo‘laklarini mutaxassislar tomonidan texnik ko‘rikdan o‘tkazilishini ta’minlash lozim.

Shuningdek, quyidagilarga amal qilish talab etiladi:

• gaz jihozlarini o‘zboshimchalik bilan tarmoqqa ulamang va joyini o‘zgartirmang;
• nosoz isitish qurilmalari va gaz jihozlaridan foydalanmang, mutaxassis ishtirokisiz gaz jihozlarini ta’mirlashga yo‘l qo‘ymang;
• gaz jihozlari va isitish qurilmalari joylashgan binolarda havo almashish kanallarining doimiy ochiq holatda bo‘lishini ta’minlang;
• mo‘ri va havo almashish yo‘llari texnik jihatdan soz bo‘lishini ta’minlang, gaz jihozlari va isitish qurilmalarini qarovsiz qoldirmang;
• yosh bolalarning gaz jihozlaridan foydalanishiga yo‘l qo‘ymang;
• gaz jihozlari joylashgan xonadan dam olish va uxlash maqsadida foydalanmang;
• tabiiy gaz sizib chiqishi holatini aniqlash uchun ochiq olovdan foydalanmang;
• gaz quvurlariga har xil so‘rg‘ichlar o‘rnatilishiga yo‘l qo‘ymang;
• gaz plitasidan kiyimlarni quritish va boshqa maqsadlarda foydalanmang;
• bino ichida gaz hidini sezsangiz elektr jihozlarini yoqib o‘chirmang, gugurt yoqmang, xonani zudlik bilan shamollating hamda tumangaz ta’minoti bo‘limiga (104) qo‘ng‘iroq qiling.