O‘zbekistonda 464 ta yonilg‘i quyish shoxobchasi faoliyati vaqtincha to‘xtatildi

O‘tkazilgan tekshiruvlar natijasida O‘zbekistonda 464 ta yonilg‘i quyish shoxobchasi faoliyati vaqtincha to‘xtatildi. Bu haqda Vazirlar Mahkamasining 22 iyundan kuchga kirgan qarorida keltirib o‘tilgan.

Qayd etilishicha, respublika bo‘ylab jami 6 196 ta suyultirilgan va siqilgan gaz quyish shoxobchalari, neftmahsulotlari quyish stansiyalari hamda aholi gaz ballonlarini to‘ldirish obektlari xatlovdan o‘tkazilgan. Xatlov yakunlariga ko‘ra, jami 46 737 ta qoidabuzarlik va kamchiliklar aniqlangan.

Xususan, qurish sohasiga oid 2218 ta, yong‘in xavfsizligi sohasiga oid 7949 ta, sanoat va texnika xavfsizligiga oid 25 341 ta, texnik jihatdan tartibga solish sohasiga oid 3354 ta, belgilangan texnilogik jarayonlarni ta’minlashga oid 7875 ta qoidabuzarliklar ro‘yxatga olingan.  Shundan kelib chiqib, 464 ta yonilg‘i quyish shoxobchasi faoliyati vaqtincha to‘xtatilgan.

1 sentabrdan boshlab barcha turdagi yonilg‘i quyish shoxobchalari va gaz to‘ldirish obektlarida, jumladan, o‘z ehtiyojlari uchun yonilg‘idan foydalanadigan obektlarda, agar belgilangan xizmat muddati o‘tgan yoki ishlab chiqarilgan sanasi aniqlanmagan bo‘lsa, ortiqcha bosim ostida ishlaydigan uskunalardan foydalanish cheklanadi. Cheklov 2030 yil 1 yanvargacha amalda bo‘ladi.

Shuningdek, 2026 yil 1 sentabrga qadar Ichki ishlar vazirligi Raqamli texnologiyalar vazirligi bilan birgalikda avtomobillarga o‘rnatilgan gaz ballonlarining texnik ko‘rikdan o‘tganiga oid «Eco Himoya» platformasi ma’lumotlarini U-Gas tizimi bilan integratsiya qilishi kerak. Bu gaz quyish vaqtida gaz ballon uskunasining texnik holati to‘g‘risidagi ma’lumotlarni tekshirish imkonini beradi.