Gruziya sudi Saakashvilini sog‘lig‘i sabab ozod qilishdan bosh tortdi 

Tbilisi shahar sudi Gruziyaning sobiq prezidenti Mixail Saakashvilini sog‘lig‘i sababli ozod etishni rad qildi. 

«Advokat Shalva Xachapuridzening Mixail Saakashvilini jazoni ijro etishdan ozod qilish yoki jazo muddatini to‘xtatib turish haqidagi iltimosnomasi qanoatlantirilmasin», dedi sudya Giorgiy Arevadze mahkama yakunida. 

6 fevral kuni Ukraina Oliy Radasi Gruziya hukumatiga, Yevroparlament, Yevropa Ittifoqi Kengashi, Yevrokomissiya, PASE va Yevropa Ittifoqi mamlakatlari parlamentlariga Mixail Saakashvilini zudlik bilan chet elda davolanish uchun jo‘natish talabi bilan murojaat qabul qilgan edi. Saakashvilida Ukraina fuqaroligi ham bor. 

Mixail Saakashvili 2021 yil oktyabr oyida Gruziyaga qaytganidan so‘ng hibsga olingan edi. Unga nisbatan bir necha jinoiy ish qo‘zg‘atilgan. Saakashvili o‘zining hibsga olinishini «siyosiylashgan tadbir» deb atadi va ochlik e’lon qildi. Keyinchalik, ochlikni to‘xtatdi. Vaqt o‘tgach, sobiq prezidentning sog‘lig‘i jiddiy yomonlashdi. 2022 yil may oyida u qamoqdan Tbilisidagi nufuzli klinikaga o‘tkazilgan edi.