AQSh Kongressi davlat qarzini oshirish bo‘yicha qonun loyihasini qabul qildi

AQSh Kongressining Vakillar palatasi respublikachilarning davlat qarzi chegarasini yanada oshirishga qaratilgan qonun loyihasini qabul qildi. Hujjat 26 aprel, chorshanba kuni kechqurun kamida ikki ovoz farqi bilan ma’qullandi. Qonun loyihasi davlat qarzi limitini yana 1,5 trillion dollarga oshirishni ko‘zda tutadi, lekin davlat xarajatlarini sezilarli darajada qisqartirish shart bo‘ladi. AQSh hukumati qarzining chegarasi hozirda 31,4 trillion dollarni tashkil etadi.

Endi hujjat ko‘rib chiqish uchun Senatga yuboriladi. U yerda demokratlar ko‘pchilikni tashkil qiladi, shuning uchun qonun loyihasi muvaffaqiyat qozonish imkoniyatiga ega emas. AQSh prezidenti Jo Bayden ham kerak bo‘lsa veto qo‘yishi haqida ogohlantirdi.

Shu nuqtayi nazardan, ekspertlar Vakillar palatasida ovoz berishni respublikachilarning Baydenni o‘zlari rozi bo‘lmagan xarajatlarni kamaytirishga majburlash uchun qilgan taktik harakati sifatida baholamoqda. Gap Baydenning kun tartibidagi asosiy masalalar, jumladan, iqlimni muhofaza qilishga sarmoya kiritish haqida ketyapti.

Vakillar palatasi spikeri Kevin Makkarti Qo‘shma Shtatlardagi defolt tahdididan Baydenga bosim o‘tkazish dastagi sifatida foydalanyapti. Agar AQSh ma’muriyatining puli tugamaguncha milliy qarz limiti oshirilmasa, bu sodir bo‘ladi.