Reportaj: 2 tonnadan ziyod giyohvandlik moddalari yoqib yuborildi

{Yii::t(}

O'tkazib yuborish 6s

O'tkazib yuborish

26 iyun – Xalqaro giyohvand moddalarga qarshi kurash kuni. Shu munosabat bilan huquqni muhofaza qiluvchi organlar tomonidan muomaladan musodara qilingan giyohvandlik vositalarini yo‘q qilish bo‘yicha tadbir o‘tkazildi.

Kun.uz muxbirining xabar berishicha, 2022 yil davomida huquqni muhofaza qiluvchi organlar tomonidan 2 tonna 232,9 kg giyohvandlik moddalari musodara qilingan. “O‘zikkilamchiranglimetall” zavodida Davlat xavfsizlik xizmati tashabbusi bilan huquqni muhofaza qiluvchi organlar ishtirokida giyohvand moddalar yoqib yuborildi.

DXX xodimi Mahliyo Valiqulovaning aytishicha, 2022 yil davomida DXX tomonidan 917 kg giyohvandlik moddalar musodara qilingan.

“Bugungi kunda sintetik narkotik moddalarning ommalashuvi ham kuzatilyapti. Natijada 32,2 kg sintetik narkotik dori vositalari musodara qilindi”, - deydi u.

Ma’lum qilinishicha, 373 ming 550 dona kuchli ta’sir qiluvchi dori vositalarining noqonuniy aylanmasiga ham chek qo‘yilgan.

“Rossiya, Qozog‘iston va Qirg‘iziston xavfsizlik organlari bilan hamkorlikda 9ta faol tadbir va maxsus operatsiyalar o‘tkazilib, 11 nafar narko-jinoyatchi ushlandi va 166.4 kg giyohvandlik vositalair musodara qilindi”, - deydi Valiqulova.

BMTning narkotiklar va jinoyatlar bo‘yicha boshqarmasining Markaziy Osiyodagi mintaqaviy vakili Ashita Mittal O‘zbekistonga sintetik narkotiklar kirib kelishi ko‘payayotganini ta’kidladi.

“Bugungi kunda O‘zbekistonda dori vositalari bozori ma’lum ma’noda o‘zgarib, uni iste’mol qilishdan kelib chiqadigan muammolar ortib borayotganini ko‘rishimiz mumkin. Nafaqat opiy va geroin, balki metamfetamin kabi sintetik narkotiklar ham O‘zbekistonga yo‘l topmoqda.

Sintetik moddalar nafaqat ko‘chada, balki internet orqali ham sotiladi. Shuning uchun kiberxavfsizlikni kuchaytirish juda muhim. O‘zbekiston aholisi juda yosh, o‘zbeklarning 60 foizga yaqinini 29 yoshgacha bo‘lgan yoshlar tashkil qiladi. Biz ularni to‘g‘ri tarbiyalashimiz, sintetik giyohvand moddalarni iste’mol qilishning zararini tushuntirishimiz kerak”, - deydi u.

BMT vakilining ta’kidlashicha, agar yoshlar o‘qimishli bo‘lsa va oqibatlarini tushunsa, bunday moddalardan masofa saqlash imkoniyati ortadi.

“Shuningdek, O‘zbekiston hukumatidan giyohvand moddalarning noqonuniy aylanishi oldini olish va bu borada qo‘shni davlatlar bilan transchegaraviy hamkorlikni mustahkamlash borasidagi muvozanatli yondashuvidan juda mamnunman”, - deydi Ashita Mittal.

Davlat xavfsizlik xizmati ma’lumotlariga ko‘ra, respublikaga afg‘on narkotiklari asosan, Tojikiston va Qirg‘iziston orqali janubiy-sharqdan – Samarqand va Sirdaryo viloyatlariga, shimoliy-sharqdan – Farg‘ona  vodiysi  viloyatlariga va Toshkent viloyatiga hamda to‘g‘ridan to‘g‘ri Afg‘onistondan Amudaryo orqali Surxondaryo viloyatiga olib kirish holatlari uchramoqda.

2022 yil davomida O‘zbekiston Respublikasi hududida giyohvandlik vositalari, psixotrop moddalar va prekursorlarning noqonuniy muomalasi bilan bog‘liq jinoyatlar sodir etganligi uchun 96 ta holatlar bo‘yicha xorijiy davlatlarning 99 nafar fuqarosi hibsga olingan. Jumladan, 12 nafar Afg‘oniston, 32 nafar Tojikiston, 25 nafar Qirg‘iziston, 14 nafar Qozog‘iston, 8 nafar Rossiya, 5 nafar Turkiya, 1 nafar Fransiya, 1 nafar AQSh va 1nafar Belarus fuqarolaridir.

Madina Ochilova tayyorladi.
Operator va montajchi - Javohir G‘ayratov.