O‘zbekiston va Dubay odam savdosi qurboni bo‘lgan ayollar himoyasi bo‘yicha memorandum imzolaydi

Tomonlar, odam savdosiga oid muammolar, ularning kelib chiqishi sabablari, bartaraf etish yo‘llari, ushbu illatdan jabr ko‘rganlarga zarur konsullik-huquqiy yordam ko‘rsatish, aybdorlarga nisbatan esa qonuniy chora ko‘rish amaliyotlari bilan bog‘liq bir qator dolzarb masalalar yuzasidan fikr almashdi.

Fatma Al Baaj Almoatasem Belah, o‘z navbatida, dunyo bo‘ylab olib borilayotgan targ‘ibot-tashviqot ishlari, amaliy tadbirlarga qaramay, hozirgi kunga qadar ko‘plab odamlar «zamonaviy qullik» - odam savdosi qurboniga aylanib qolayotganini ta’kidladi. 

«Odam savdosidan jabr ko‘rayotganlar orasida ayollar soni ortib borayotgani hamda transmilliy jinoyatchilik chegara tanlamasligi inobatga olinib, yuqoridagi muammolarni hal qilishda xalqaro hamkorlikni yanada kengaytirish muhim», - dedi Fatma Al Baaj Almoatasem Belah.

Bo‘lib o‘tgan suhbat yakunida O‘zbekiston Bosh konsulligi va «Dubay ayollar va bolalarni himoya qilish jamg‘armasi» o‘rtasida odam savdosi qurboni bo‘lgan ayollar hamda undan jabr ko‘rganlarni himoya qilish maqsadida ikki tomonlama Hamkorlik memorandumini ishlab chiqish va imzolash to‘g‘risida kelishib olindi.