USAID administratorining Osiyo bo‘yicha yordamchisi o‘rinbosari O‘zbekistonga keladi

26-30 avgust kunlari AQSh Xalqaro taraqqiyot agentligi (USAID) Osiyo bo‘yicha byuro yordamchisi o‘rinbosari Anjali Kaur O‘zbekistonga kelmoqda. AQSh-O‘zbekiston hamkorlik aloqalarini rivojlantirishni maqsad qilgan tashrif doirasida Kaur xonim USAIDʼning mamlakatdagi hamkorlari va hukumat rasmiylari bilan uchrashadi.

Foto: USAID

Xususan, dastur davomida Samarqandda ingliz tili o‘qituvchilari bilan davra suhbati, USAID tomonidan moliyalashtirilgan migrantlar uchun maslahat markaziga tashriflar nazarda tutilgan.

USAID vakolatxonasining ma’lum qilishicha, Anjali Kaur farmatsevtika sohasida xalqaro sifat standartlarini ta’minlash hamda xavfsiz dori vositalaridan foydalanish imkoniyatlarini oshirish bo‘yicha SSV huzuridagi markaz bilan anglashuv memorandumini imzolashi kutilmoqda.

Anjali Kaurning faoliyat doirasi Janubiy va Markaziy Osiyo, jumladan, O‘zbekiston, shuningdek, butun Osiyo mintaqasi uchun texnik xizmatlarni qamrab oladi.

22 avgust kuni AQSh Xalqaro taraqqiyot agentligining (USAID) O‘zbekistondagi missiyasiga Devid Xofman yangi direktor etib tayinlagani xabar berilgan edi.