Ҳиндистон АҚШнинг бир қатор қишлоқ хўжалиги маҳсулотларига божларни камайтиришга рози бўлди. Келишувга Нью-Деҳлидаги G20 саммити олдидан эришилган.
Ҳиндистон ва АҚШ Нью-Деҳлидаги йигирматалик (G20) саммити олдидан Жаҳон савдо ташкилотидаги сўнгги мунозарали масалаларни ҳал қилди. 8 сентябр, жума куни АҚШ савдо вакили Кэтрин Тайнинг айтишича, келишув икки томонлама муносабатларда «янги саҳифа очади».
Икки давлат ўртасидаги сўнгги ҳал этилмаган тегишли можаро Ҳиндистоннинг парранда гриппидан хавотири туфайли Америка Қўшма Штатларидан айрим қишлоқ хўжалиги маҳсулотларини импорт қилиш бўйича чекловларига тааллуқли. Энди Нью-Деҳли баъзи Америка маҳсулотлари, жумладан музлатилган курка ва ўрдак, шунингдек, янги черника ва клюква учун тарифларни камайтиришга рози бўлди.
Бу ҳаракат америкалик ишлаб чиқарувчиларнинг иқтисодий истиқболларини яхшилайди, дейди Вашингтон. Оқ уй икки давлат ўртасидаги «яқин ва давом этаётган ҳамкорликни» таъкидлади. Июн ойида Ҳиндистон ва Қўшма Штатлар 6 та мунозарали масалани ҳал қилди. Нью-Деҳли Қўшма Штатлардан нўхат ва ясмиқ учун тарифларни камайтиришга рози бўлди.
Ҳиндистон бош вазири ва АҚШ президенти келгуси ҳамкорликни муҳокама қилди
Шу куни Ҳиндистон бош вазири Нарендра Моди АҚШ президенти Жо Байденни ўз қароргоҳида қабул қилди. Учрашув ёпиқ эшиклар ортида бўлиб ўтди. Томонлар мудофаа, астронавтика ва тадқиқот соҳаларида ҳамкорликни кучайтиришга келишиб олди, бу ҳақда қўшма баёнотда айтилган.
