Germaniya o‘z kompaniyalariga O‘zbekistonga sarmoya kiritishda imtiyozlar beradi

Germaniya O‘zbekistonni iqtisodiy hamkorlikni rivojlantirishga qaratilgan 36 ta ustuvor davlatlar ro‘yxatiga kiritdi. Bu haqda Deutsche Welle xabar berdi. 

Dasturga muvofiq, nemis kompaniyalari O‘zbekistonga sarmoya kiritsa, imtiyozli sarmoya kafolatlarini oladi. Ushbu qaror nemis korxonalarining Xitoyga qaramligini kamaytirish, e’tibor va kapitalni nemis kompaniyalari faolligi past bo‘lgan, istiqbolli rivojlanayotgan bozorlarga yo‘naltirishga qaratilgan. 

Osiyo qit’asida O‘zbekiston bilan birga ro‘yxatga Qozog‘iston, Viyetnam, Hindiston, Indoneziya, Malayziya, Tailand va Filippin ham kiritilgan. Ta’kidlanishicha, aholisi ko‘p va tez rivojlanayotgan iqtisodiyotga ega bu mamlakatlarning barchasi nemis biznesiga shu paytgacha Xitoyda qadrlangan narsani bera oladi: nisbatan arzon ishchi kuchining ko‘pligi va yirik savdo bozori. 

Afrika ro‘yxatda eng ko‘p ifodalangan. Unga Jazoir, Benin, Kot-d’Ivuar, Gana, Misr, Keniya, Marokash, Ruanda, Senegal, Togo, Tunis, Efiopiya, Janubiy Afrika kiradi. Janubiy Amerikada tanlov Argentina, Braziliya, Kolumbiya, Peru va Chiliga tushdi. Janubi-Sharqiy Yevropada esa Albaniya, Bosniya va Gersegovina, Shimoliy Makedoniya, Serbiya, Chernogoriya, shuningdek, Turkiya va Kosovo. 

Germaniya Iqtisodiyot va iqlimni muhofaza qilish vazirligi (BMWK) tomonidan berilgan tushuntirishga ko‘ra, nemis kompaniyalari uchun yaxshi shart-sharoitlarga ega bo‘lgan, ammo hozirgacha ular tomonidan kamroq e’tibor qaratilayotgan mamlakatlarga yo‘naltirilgan sarmoyalar rag‘batlantiriladi.