O‘zbekistonda YeXHT bilan jurnalistlar mahoratini oshirish bo‘yicha qo‘shma loyihalar ishlab chiqiladi

O‘zbekiston tashqi ishlar vaziri o‘rinbosari G‘ayrat Fozilov Yevropada xavfsizlik va hamkorlik tashkilotining (YeXHT) ommaviy axborot vositalari erkinligi bo‘yicha vakili Tereza Ribeyro bilan uchrashuv o‘tkazdi.

TIV ma’lumotiga ko‘ra, muloqotda so‘nggi yillarda O‘zbekistonning YeXHT huzuridagi barcha institutlar, xususan, Tashkilotning OAV erkinligi bo‘yicha vakili ofisi bilan hamkorligi yangi bosqichga ko‘tarilgani qayd etildi. Shu nuqtayi nazardan, tomonlar o‘zaro manfaatli sohalarda hamkorlikni yanada kengaytirish bo‘yicha takliflarni muhokama qildi.

Turli yo‘nalishlarda, jumladan, O‘zbekistonda jurnalistlarning kasbiy mahoratini oshirish bo‘yicha qo‘shma loyihalarni amalga oshirishga ikki tomon ham tayyor ekani tasdiqlandi.

Muzokaralar davomida YeXHT va uning institutlari faoliyatini takomillashtirish yuzasidan ham fikr almashildi.