Germaniyada jurnalistlarga qarshi jinoyatlar soni keskin oshdi

Hujjatga ko‘ra, 2024 yil 1 apreldan 2025 yil 30 noyabrgacha bo‘lgan davrda Germaniya Federal jinoyat ishlari idorasi (BKA) matbuotga nisbatan 818 ta siyosiy sababga ega jinoyatni qayd etgan, shulardan 89 tasi — zo‘ravonlik bilan bog‘liq. O‘rtacha hisobda bu oyiga taxminan 41 ta holat degani, bu esa 2023 yil darajasidan 71 foiz yuqori (2023 yilda 290 ta holat, ya’ni oyiga taxminan 24 ta).

Eng ko‘p jinoyatlarni — taxminan uchdan bir qismini (244 ta) — hokimiyatlar “o‘ng ekstremizm” toifasiga kiritgan, yana 78 ta holat “so‘l ekstremizm” sifatida tasniflangan. 153 marta jurnalistlarga nisbatan qonun “xorijiy mafkura” sabab buzilgan, 31 marta — “diniy mafkura” sabab. Yana 312 ta huquqbuzarlik “boshqa” toifaga tushgan, chunki ularni yuqoridagi to‘rt guruhdan birortasiga aniq kiritish imkonsiz bo‘lgan.

Shu bilan birga, Germaniya poytaxti Berlinda OAV xodimlariga nisbatan 406 ta jinoyat qayd etilgan — bu barcha holatlarning deyarli yarmi. Keyingi o‘rinlarda Saksoniya (82 ta), Bavariya (64 ta) va Shimoliy Reyn – Vestfaliya (55 ta) keladi.

Qayd etilishicha, 211 ta qonunbuzarlik namoyishlar vaqtida sodir etilgan. Ular orasida 73 ta zo‘ravonlik jinoyati bor — ya’ni zo‘ravonlik bilan bog‘liq barcha jinoyatlarning 82 foizi.

Internetda jurnalistlarga qarshi sodir etilayotgan huquqbuzarliklar soni ham o‘smoqda. 2024 yilda BKA bunday 217 ta holatni qayd etgan bo‘lsa, 2025 yilda ko‘rsatkich 333 taga yetgan. Ko‘p hollarda gap nafrat qo‘zg‘atish haqida ketgan.

Inson huquqlarini himoya qiluvchi “Chegara bilmas muxbirlar” tashkiloti 2024 yilda Germaniyada OAV xodimlari va tahririyatlarga qarshi 89 ta hujumni hujjatlashtirgan, 2025 yilda esa — 55 ta. Ko‘pincha hujumchilar jurnalistlarni oyoq va musht bilan urgan, ba’zan esa turli buyumlardan ham foydalangan.