Ukrainada jang qilayotgan rossiyalik mahkumlarning afv etilishi qonunlarni buzayotgani aytildi

Ukrainaga qarshi urushda qatnashgani uchun sudlanganlarni Rossiya prezidenti Vladimir Putinning maxfiy farmonlari bilan afv etish ham jabrlanganlarning, ham boshqa fuqarolarning huquqlarini buzadi. Bu haqda Jinoyat qurbonlarini qo‘llab-quvvatlash jamg‘armasi (QQJ)ning  11 yanvar, payshanba kuni QQJ Telegram-kanalida e’lon qilingan xabarida aytiladi.

Putin mahkumlarni afv etish va ularning sudlanganligini olib tashlash to‘g‘risidagi farmonlarni imzolagan, bu Rossiya qonunlariga ziddir, deyiladi xabarda. Sudlanganlik faqat jazoni o‘tagan mahkumlar uchun olib tashlanishi mumkin.

Qonunlarning yana bir buzilishi shundan iboratki, mahkumlar frontda olti oy o‘tkazganidan so‘ng  afv etilyapti va urushda qatnashishdan ozod qilinyapti. Shu bilan birga, safarbar qilingan rossiyaliklar va shartnoma bo‘yicha askarlar xizmat muddati belgilanmagan, deya ta’kidlaydi hisobot mualliflari. Shu tariqa, bir necha oydan beri safarbar qilinganlarning xotinlari Ukrainada bir yildan ortiq urush olib borgan erlarini vataniga qaytarishni talab qilmoqda, biroq Rossiya rasmiylari bu talablarga e’tibor bermayapti.

Afv etilganlar yana og‘ir jinoyatlar sodir etyapti

Rossiya qonunlariga ko‘ra, jabrlanuvchilar mahkumning koloniyaga kelganidan to qamoqdan ozod etilishigacha bo‘lgan harakatlari haqida to‘liq ma’lumot olish huquqiga ega. Bunday ma’lumotlarni olishga uringan jabrlanuvchilarga rad javobi berilgan, chunki mahkumlar prezidentning maxfiy farmoni bilan afv etilgan, deyiladi xabarda.

Bundan tashqari, afv etish to‘g‘risidagi masalani ko‘rib chiqishda jabrlanuvchilarning fikri ham inobatga olinishi shart. Biroq, bu sodir bo‘lmayapti, rasmiylarning hech biri ularga bunday savol bilan murojaat qilmagan, deydi hisobot mualliflari. Hujjatda ta’kidlanganidek, Ukrainadan qaytgan afv etilgan o‘ta xavfli jinoyatchilarning bir qismi yana og‘ir zo‘ravonlik jinoyatlarini sodir etyapti, bu esa jamiyatda keskinlikni kuchaytirmoqda.