Qozog‘iston Orol dengizi atrofida saksovul ekiladigan maydonlarni ko‘paytirmoqchi

Dunyodagi eng yirik ekologik ofat markazi hisoblangan Orol dengizining 6 million gektar maydoni sho‘rlangan bo‘lib, uning 2,8 million gektari Qozog‘iston hududiga to‘g‘ri keladi. Qozog‘iston va O‘zbekiston uning oqibatlarini bartaraf etish uchun birgalikda harakat qilmoqda. 

Qayd qilinishicha, Qozog‘iston Orol dengizi suvi qaytib ketgan joylarga intensiv ravishda saksovul ekmoqda. Mustaqillik yillarida 900 ming gektardan ortiq maydonga chigit va ko‘chat ekilgan. Shuningdek, 13 yil avval 1 million tup ko‘chat tayyorlaydigan ko‘chatxona barpo etilgan bo‘lsa, endi keyingisini qurish ishlari boshlab yuborilgan. Uning hududi 33 gektardan oshadi. 

Orol suvi qaytib ketgan joylarga ekish uchun cho‘lga eng chidamli hisoblangan saksovul va qorabarak o‘simliklari tanlangan. Bu mikroiqlimni yaxshilaydi va shunga mos ravishda yerning unumdorligini oshiradi.

«Orol faqat bitta davlatning muammosi emas. Shunday ekan, Qozog‘iston va O‘zbekiston hamkorlikda uning oqibatlarini bartaraf etsa, butun qit’aga ijobiy ta’sir ko‘rsatadi. Har yili qurigan Orol tubidan 150 million tonnaga yaqin tuz va chang ko‘tariladi. Qozog‘iston va O‘zbekiston mutaxassislari yordamida bu muammoni hal qilamiz, deb o‘ylaymiz», dedi Qozog‘iston qishloq xo‘jaligi fanlari doktori Zinoviy Novitskiy. 

Qozog‘iston hukumati yaqin kunlarda Orol dengizida saksovul ekiladigan maydonni 1,5 million gektarga yetkazmoqchi. Shu maqsadda o‘rmon xo‘jaligiga katta mablag‘ ajratish ko‘zda tutilgan.