Djurayev, Babayev, Imamxadjayev: hujjatlarda ism-familiyalarni tuzatish soddalashtiriladimi? Adliya vazirligi javob berdi

Adliya vazirligi boshqarma boshlig‘i Nusratullo Parpixo‘jayevga ko‘ra, shaxsni tasdiqlovchi hujjatdagi xatolikni tuzatish uchun agar u qaysidir harfni o‘zgartirish bilan bog‘liq bo‘ladigan bo‘lsa, muammo bo‘lmaydi.  

“Ismda faqat harflarni o‘zgartirishga zarurat tug‘ilsa, misol uchun “k” harfini “q” ga, “o” harfini “a” ga o‘zgartirish kerak bo‘lsa, masalani hal etishda muammo bo‘lmaydi. Fuqarolar bu borada FHDYoga murojaat qilishsa, mas’ullar hujjatlarni ichki ishlar organlariga yuboradi. Ariza ko‘rib chiqilib, tasdiqlanganidan so‘ng shaxsning ma’lumotlari o‘zgartiriladi. Ismning ma’nosi o‘zgaradigan darajada ko‘p harflar almashadigan bo‘lsa, unda shaxsning ota-onasi, (agar bo‘lsa) farzandlari ism-familiyasini ham to‘g‘rilash kerak bo‘ladi. Aytish joiz, amaliyotda ism o‘zgartirishda qiyin jarayon yo‘q. Bu eksterritorial xizmat hisoblanadi” deya ta’kidladi Nusratullo Parpixo‘jayev. 

Qo‘shimcha qilinishicha, fuqarolar ism-familiyasini o‘zgartirish bilan bog‘liq masalani istalgan FHDYo bo‘limiga murojaat qilib hal etishlari mumkin.