Germaniyadagi shaharcha gazetada e’lon berib, yangi hokim axtarmoqda

Shimoliy dengizdagi Vangerooge orolida joylashgan shu nomdagi shaharcha yangi rahbar izlashga kirishdi — bu safar e’lon gazetada chop etildi, deb xabar bermoqda Spiegel nashri.

Xristian-demokratlar, sotsial-demokratlar va «yashillar» partiyasi Vangeroogeda hokimlik uchun munosib nomzod topish maqsadida qo‘shma tarzda gazetada e’lon berishga qaror qildi.

E’londa shunday deyiladi: «Biz bilan siz mas’uliyatli lavozimda kelajakni shakllantira olasiz».

Bu e’lon shanba kuni mahalliy nashrda chop etildi va yaqin kunlarda boshqa nashrlarda ham tarqatiladi.

Vakansiyada aniq talablar ham keltirilgan:

– orolda yashashga tayyorlik,

– oliy ma’lumot,

– ma’muriy ish tajribasi,

– qonunda belgilangan yosh doirasiga kirish (23–67 yosh).

Siyosiy partiyalar bu tashabbus orqali hokimiyatdagi kadr tanqisligi muammosini hal qilishni ko‘zlamoqda. Ta’kidlanishicha, administrativ sohada malakali xodim topish, ayniqsa orolda, deyarli imkonsiz bo‘lib qolgan.

Qizig‘i, 7 yil oldin ham shahar aynan shunday usul — gazetada e’lon orqali hozirgi hokim Marsel Fangorni topgandi. Yaqinginada mayoqchi lavozimi uchun e’lon internetda virusli tarzda tarqalib, Vangerooge butun Germaniyaga mashhur bo‘lgandi. 

Orolda yangi hokim saylovi 17 avgustga belgilangan. Nomzodlar 14 iyungacha hujjat topshirishi mumkin.