Borrel: YeI yoz oxirigacha 60 ming ukrainalik harbiyni tayyorlaydi

Yevropa Ittifoqining EUMAM o‘quv missiyasi doirasida 50 ming ukrainalik harbiy xizmatchi o‘qitildi va yoz oxiriga borib ularning soni 60 mingga yetishi kerak. Bu haqda 28 may, seshanba kuni Bryusselda Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel ma’lum qildi. Ukraina ko‘proq odamlarni safarbar qilishi kerak ekan, unga ko‘proq ta’lim imkoniyatlari kerak bo‘ladi va Yevropa Ittifoqi, o‘z navbatida, EUMAM missiyasini kengaytirishga tayyor, dedi Borrel Yevropa Ittifoqi mudofaa vazirlari yig‘ilishidan keyin o‘tkazilgan matbuot anjumanida. 

«O‘quv salohiyatimizni oshirish bo‘yicha konsensus ortib bormoqda, - dedi Yevropa diplomatiyasi rahbari. - Lekin men bunga erisha olishimizga ishonch hosil qilmagunimcha, yangi raqamni e’lon qilishni xohlamayman». Uning so‘zlariga ko‘ra, vazirlar uchrashuvda o‘quv missiyasini Ukrainaga qisman o‘tkazish mavzusini ham muhokama qilgan, biroq bu masala bo‘yicha aniq umumevropa pozitsiyasi yo‘q. 

G‘arb qurollari bilan Rossiya hududiga zarba berish haqida munozara

Xuddi shunday, Yevropa Ittifoqi Ukrainaning Rossiya hududidagi harbiy nishonlarga hujum qilish uchun YeI davlatlari tomonidan berilgan qurollardan foydalanishi joizmi yoki yo‘qmi, shu masala borasida bir fikrga ega emas. «Agar bu mutanosib ravishda amalga oshirilsa, xalqaro huquq bo‘yicha qonuniy harakat ekanligi aniq, ammo bu har bir alohida davlat uchun qaror bo‘lib, u mustaqil ravishda javobgarlikni o‘z zimmasiga olishi kerak», dedi Jozep Borrel. Uning so‘zlariga ko‘ra, Yevropa Ittifoqi mamlakatlari orasida bunga keskin qarshi bo‘lganlar ham, boshidanoq Kiyevni bunday sharsiz qurol bilan ta’minlaganlar ham, yaqinda qurol qo‘llash bo‘yicha hududiy cheklovni olib tashlashga rozi bo‘lganlar ham bor. Biroq, Borrel bunday davlatlar soni va qaysi toifalar ko‘pchilikni tashkil etishini aytmaslikni ma’qul ko‘rdi. 

Uning ta’kidlashicha, bu holat Rossiyaga yaqqol ustunlik beradi, biroq Yevropa Ittifoqi o‘z a’zolariga Ukraina uchun hududiy cheklovni olib tashlash yoki olib tashlamaslikni buyurmaydi.

NATO bosh kotibi Yyens Stoltenberg Bryusselda vazirlar bilan uchrashuv oldidan shunday fikr bildirdi. U yana bir bor ta’kidladiki, Ukraina o‘zini himoya qilish huquqiga ega, bu o‘z hududidan tashqaridagi nishonlarni mo‘ljalga olishni ham o‘z ichiga oladi. «Xususan, bu hozir dolzarb, chunki eng og‘ir janglar Xarkiv viloyatida va Ukraina-Rossiya chegarasi yaqinida bo‘lib o‘tmoqda va shuning uchun, albatta, ukrainaliklar harbiy nishonlarga zarba bera olmasalar, o‘zlarini himoya qilishlari juda qiyin bo‘ladi. Chegaraning narigi tomonida Ukrainaga hujum qilish uchun ishlatiladigan raketalar, artilleriya va aerodromlar bo‘lishi mumkin», dedi NATO bosh kotibi. Uning fikricha, Kiyevning qurol ishlatishiga cheklovlar kiritgan mamlakatlar o‘z qarorlarini qayta ko‘rib chiqishi vaqti keldi.