Yangi “Makon” telekanali: O‘zbekiston mediamakonida yangi burilish

Amirxon Umarov, Davron Muqimov va Kamola Ikramova kabi kreativ mediaekspertlar jamoasi “Makon” nomli yangi telekanalning ochilishini e’lon qilishdi. 2024 yil 19 oktyabrdan test rejimida efirga uzatilishi boshlangan yangi telekanal tomoshabinlar tomonidan ijobiy qarshi olindi. Kanal asosan ayollarga mo‘ljallangan maxsus kontentni tayyorlashni reja qilgan bo‘lib, aktual mavzularni muhokama qilish, madaniy almashinuvni rivojlantirish va yuqori sifatli ko‘ngilochar dasturlarni taqdim etishga yo‘naltirilgan. 

Kanal direktori Amirxon Umarov ta’kidlaganidek, zamonaviy teleefir texnologiyalaridan, xususan, onlayn platformalar va interaktiv formatlardan foydalanish “Makon” telekanalini nafaqat O‘zbekistonda, balki butun dunyodagi keng auditoriya uchun ham ochiq formatga olib chiqadi. 

"Biz telekanalimizni har bir tomoshabinga, uning joylashuvidan qat’iy nazar, yetib borishini istaymiz. Texnik yechimlarimiz va innovatsion yondashuvlarimiz bu maqsadga erishishga yordam berishiga ishonaman. Shuningdek, biz kreativ jamoalar va yangi prodakshn kompaniyalar bilan yaqindan hamkorlik qilishni rejalashtirganmiz. Bu ilg‘or media ekotizimini yaratish yo‘lida muhim qadamdir", — deydi Amirxon Umarov. 

“Makon” telekanali efiridan yuqori sifatli seriallar va sitkomlar, qiziqarli dasturlar, realiti-shoular va musiqiy ko‘rsatuvlar, mahalliy va xorijiy filmlar o‘rin oladi. Bu yondashuv tomoshabinlarning keng doirasini jalb etish va ularga betakror hamda dolzarb kontent taqdim etish imkonini beradi. 

Kanal Bosh prodyuseri Davron Muqimov telekanalning milliy madaniyatni mustahkamlashdagi o‘ziga xos ahamiyatini alohida ta’kidladi. 

"Biz madaniyat va san’atni saqlab qolish va rivojlantirishga xizmat qilamiz. Shuningdek, milliy an’analarni yanada boyitish va zamonaviy ahamiyat kasb etuvchi mavzularni yoritamiz. Tomoshabinning qalbiga yetib borish, ularning ehtiyojlarini hisobga olish, o‘zbek tilimiz va qadriyatlarimizni saqlab qolish ham bizning ustuvor yo‘nalishlarimizdan biridir” – qo‘shimcha qildi Davron Muqimov. 

Kanalning Bosh muharriri Kamola Ikromova ta’kidlaganidek, “Makon” nafaqat ko‘ngilochar vazifalarni, balki ma’lumot va ilhom manbai bo‘lishni o‘z ichiga olgan. 

“Makon” telekanalining efirini mahalliy kontent bilan boyitishni maqsad qilganmiz. Madaniy o‘zlikni saqlash, mahalliy kreativ sohalarni rivojlantirish va tomoshabinlarga mamlakatning an’analari, qadriyatlarini aks ettiruvchi noyob kontentni taqdim etish – bizning strategik ahamiyatga ega vazifamiz” — dedi Kamola Ikramova. 

“Makon” telekanali yangi media trendlarini o‘zida mujassam etib, O‘zbekistonning zamonaviy OAV kelajagini belgilashni o‘z oldiga maqsad qilgan.

Reklama huquqi asosida