Tailandda 186 mln dollarlik firibgarlik ishiga aloqador ayol hibsga olindi

Tailanddagi Xat’yay xalqaro aerportida mamlakat tarixidagi eng yirik firibgarlik ishiga aloqador ayol hibsga olindi, deb xabar beradi Bangkok Post.

Ma’lum qilinishicha, Oratai ismli ayol 6,3 milliard batlik (186 million dollar) firibgarlik ishida gumonlanmoqda. Uning hibsga olinishi 2022 yilgi tergov bilan bog‘liq. O‘shanda Essilor Manufacturing kompaniyasining ikki nafar top menejeri transmilliy jinoiy sxema qurboniga aylangani aniqlangan edi.

Nashr ma’lumotlariga ko‘ra, firibgarlar LinkedInʼda amerikalik harbiy shifokorning soxta profilidan foydalanib, xalqaro kompaniyaning Tailanddagi filialini moliyaviy direktori ishonchiga kirib olgan. Firib natijasida korporativ hisobraqamlardan 186 million dollar o‘g‘irlangan.

Oratai nigeriyalik hamkori iltimosiga ko‘ra bank hisobraqamini ochganini tan olgan, chunki u chet el fuqarosi bo‘lgani uchun o‘zi bu ishni qila olmagan.

Kompaniya moliyaviy direktori allaqachon qo‘lga olingan va unga ayblov e’lon qilingan, hukumat Tailand va Nigeriya fuqarolari bo‘lgan qariyb 100 kishini hibsga olish orderini bergan.

Eslatib o‘tamiz, 2024 yil may oyida Germaniya va bir qancha Bolqon davlatlari tergov organlari telefon firibgarlarining yirik umumevropa tarmog‘ini fosh qilgandi. Firibgarlik tarmog‘iga ulangan qo‘ng‘iroq markazlari G‘arbiy Bolqonning to‘rtta davlati va Livanda aniqlangan.