Tesla ruldagi muammolar sabab 376 mingdan ziyod mashinasini chaqirib oladi

Amerikaning Tesla kompaniyasi rul kuchaytirgichdagi muammolar sabab 376 mingdan ziyod avtomobillarini chaqirib oladi. Bu haqda AQSh Yo‘l harakati xavfsizligi milliy boshqarmasiga (NHsA) xabarida so‘z boradi.

«Tesla 2023 yilda ishlab chiqarilgan, dasturiy ta’minoti versiyasi 2023.38.4 gacha bo‘lgan Model 3 va Model Y avtomobillarining bir qismini chaqirib oladi. Elektron rul kuchaytirgich platasida ortiqcha kuchlanish yuzaga kelishi mumkin, bu esa avtomobil to‘xtab, so‘ng qayta tezlashganda rul kuchaytirgichning ishlamay qolishiga olib keladi», — deyiladi xabarda.

Hujjatga ko‘ra, chaqirib olinishi kutilayotgan avtomobillar soni 376 ming 241 tani tashkil etadi.

Kompaniya dasturiy ta’minot uchun bepul yangilanishni chiqargan va 25 martaga qadar xabarnomalarni yuborishni rejalashtirmoqda.

Eslatib o‘tamiz, dekabr oxirlarida Tesla kompaniyasi shinalarda bosimni nazorat qilish tizimidagi muammolar sabab AQShdagi 694 mingdan ziyod avtomobilini chaqirib olishi ma’lum bo‘lgandi. Undan oldin esa AQSh Yo‘l harakati xavfsizligi milliy boshqarmasi Hyundai Tucson va Santa Cruz avtomobillari tormoz tepkisi bosilmagan taqdirda ham «avtoturargoh» rejimidan chiqib ketishi mumkinligidan ogohlantirgan edi.