Ukraina va Rossiya 24 mart kuni Saudiya Arabistonida AQSh bilan uchrashadi

Ukraina prezidenti Volodimir Zelenskiy Kiyev va Vashington Ukraina va Rossiya armiyalari o‘rtasida qisman o‘t ochishni to‘xtatish bo‘yicha muzokaralar o‘tkazishini tasdiqladi. Uchrashuv 24 mart kuni Saudiya Arabistonida bo‘lib o‘tadi, dedi u 20 mart, payshanba kuni Osloda Norvegiya bosh vaziri Yonas Gar Styor bilan o‘tkazilgan matbuot anjumanida.

Zelenskiy o‘t ochishni to‘xtatish rejimini fuqarolik infratuzilmasiga ham uzaytirmoqchi 

Uning so‘zlariga ko‘ra, muzokaralarda Ukrainani «texnik guruh» taqdim etadi. Shu bilan birga, avvaliga Ukraina va Amerika tomonlari o‘rtasida uchrashuv bo‘lib o‘tadi, keyin amerikaliklar ruslar bilan uchrashadi, dedi u Vashington taklifiga ishora qilib. Zelenskiyning ta’kidlashicha, muzokaralar mavzusi energiya obektlariga nisbatan o‘t ochishni to‘xtatish rejimini o‘rnatish bo‘ladi.

Shu bilan birga, Ukraina rahbari fuqarolik infratuzilmasi obektlarini ushbu ro‘yxatga kiritishni qat’iy talab qilishini ta’kidladi. Ekspertlar guruhlari bunday obektlar ro‘yxatini tayyorlaydi, deya qo‘shimcha qildi u. «Tomonlar kelishib olgan narsa turlicha talqin qilinishini istamayman», dedi Volodimir Zelenskiy. Uning so‘zlariga ko‘ra, bunday qaror o‘t ochishni to‘liq to‘xtatish va urushni tugatish yo‘lidagi birinchi qadam bo‘lishi mumkin.

Rossiya delegatsiya a’zolari nomini ma’lum qildi 

Shu kuni Rossiya prezidenti yordamchisi Yuriy Ushakov 24 mart kuni Ar-Riyodda Rossiya va AQSh delegatsiyalarining uchrashuvi bo‘lib o‘tishi rejalashtirilganini e’lon qildi. Muhokamada Qora dengizda kemalar xavfsizligi bo‘yicha tashabbusni yangilash masalasi ham muhokama qilinadi, dedi u. Muzokaralarda Rossiya tomonidan Federatsiya kengashining Xalqaro aloqalar bo‘yicha qo‘mitasi rahbari Grigoriy Karasin va FSB direktori maslahatchisi Sergey Beseda ishtirok etadi.

O‘z navbatida, Kreml matbuot kotibi Dmitriy Peskov Saudiya Arabistonidagi muzokaralarda Rossiyaning Ukrainaga qarshi urushini tugatishning boshqa «nyuanslari» va «aspektlari» ham muhokama qilinishini aytdi.

Ukraina va Amerika delegatsiyalarining birinchi uchrashuvi 11 mart kuni Jidda shahrida bo‘lib o‘tdi. U yerda AQSh va Ukraina vakillari 28 fevral kuni Oq uyning Oval kabinetida Volodimir Zelenskiy va AQSh prezidenti Donald Tramp o‘rtasidagi janjaldan keyin Rossiyaning Ukrainaga qarshi urushini tugatish imkoniyati bo‘yicha konstruktiv muloqotni tiklashga muvaffaq bo‘ldi.