Yapon restorani aksiyalari narxi sho‘rvadagi o‘lik kemiruvchidan so‘ng tushib ketdi

Yaponiyadagi Sukiya restoranlari tarmog‘iga egalik qiluvchi Zensho Holdings kompaniyasi aksiyalari mijoz sho‘rvasidan o‘lik kemiruvchi topilganidan keyin 7,1 foizga arzonlashdi, deb xabar berdi Bloomberg.

Qayd qilinishicha, hodisa 21 yanvar kuni sodir bo‘lgan. Biroq, kompaniya bu haqda faqat o‘lik kemiruvchi haqidagi video ijtimoiy tarmoqlarda tarqalgach, oradan 2 oy o‘tib xabar bergan.

Yaponiya g‘arbidagi Tottori shahrida sodir bo‘lgan hodisada kemiruvchi sho‘rvaga taom tayyorlash jarayonida tushgan. Ammo xizmatchilar uni buni payqamagan. Restoran sanitariya tekshiruvi uchun yopilgani, unga «begona narsalar» kirib kelishi ehtimolini bartaraf etish choralari ko‘rilgani va xodimlar gigiyena nazorati bo‘yicha qo‘shimcha treningdan o‘tkazilgani ta’kidlanmoqda. Sog‘liqni saqlash xodimlari tomonidan o‘tkazilgan tekshiruvdan so‘ng, restoran faoliyatini davom ettirgan. Sukiya voqeani tezroq oshkor qilmagani uchun uzr so‘radi.

Ta’kidlanishicha, hodisa oshkor bo‘lgach, Zensho Holdings aksiyalari qiymati 7 foizgacha tushib ketgan. Vaholanki, oxirgi 12 oy ichida aksiyalar narxi taxminan 25 foizga oshgan edi.

Kontekstdan gap qaysi kemiruvchi - kalamush yoki sichqon haqida ketayotgani aniq emas. Ijtimoiy tarmoqlarda «omadsiz taom» videolari va skrinshotlari tarqaldi, xususan, SCMP uning fotosuratini nashr etdi.

Sho‘rva ichidagi kemiruvchi hodisasi Sukiya biznesidagi tarkibiy muammoni ko‘rsatmaydi, biroq kompaniya buni yagona hodisa sifatida unutib qoldirolmaydi. Voqeaning Zensho aksiyalariga uzoq muddatli ta’siri qancha mijoz yo‘qotilgani bilan bog‘liq.