10 aprelda Istanbulda Rossiya va AQSh vakillarining uchrashuvi bo‘lib o‘tadi

10 aprel kuni Istanbulda Rossiya va AQSh vakillarining yangi uchrashuvi bo‘lib o‘tadi, dedi Kreml matbuot kotibi Dmitriy Peskov. Gap diplomatik missiyalar faoliyatini normallashtirish bo‘yicha maslahatlashuvlarning ikkinchi raundi haqida bormoqda, dedi 8 aprel, seshanba kuni Rossiya TIV spikeri Mariya Zaxarova.

Uning so‘zlariga ko‘ra, ishtirokchilar tarkibi o‘zgarishsiz qoladi: Rossiya delegatsiyasiga AQShdagi elchi Aleksandr Darchiyev, Amerika delegatsiyasiga esa davlat kotibining Yevropa va Yevrosiyo masalalari bo‘yicha yordamchisi o‘rinbosari Sonata Koulter boshchilik qiladi. Reuters agentligi diplomatik manbalarga tayanib, 10 aprel kuni muzokaralar o‘tkaziladigan joy Rossiyaning Istanbuldagi konsulligi bo‘lishini ko‘rsatmoqda.

27 fevral kuni Istanbulda diplomatik missiyalar ishi bo‘yicha maslahatlashuvlarning birinchi raundi bo‘lib o‘tdi. Amerika Bosh konsuli qarorgohidagi ko‘p soatlik uchrashuv yopiq formatda o‘tkazildi.

Shundan so‘ng Amerika tomoni uchrashuvda «ikki davlat diplomatik vakolatxonalari faoliyatini normallashtirish bo‘yicha qadamlar belgilangani» haqida xabar berdi. Rossiya Tashqi ishlar vazirligi «muhokamalar mazmunli va ishchan ruhda o‘tganini» ta’kidladi. Tomonlar munosabatlardagi ko‘plab «salbiy omillar»ni yengish yo‘llarini muhokama qildilar va diplomatik vakolatxonalarni to‘siqsiz moliyalashtirish va diplomatlar faoliyati uchun tegishli shart-sharoitlar yaratish bo‘yicha qo‘shma qadamlar haqida kelishib oldilar, deya xabar qildi Moskva. Rossiya tomoni AQShga to‘g‘ridan to‘g‘ri havo qatnovini tiklash imkoniyatini ko‘rib chiqishni taklif etdi.