Zelenskiy rossiyalik targ‘ibotchilarga qarshi sanksiyalar joriy qildi

Ukraina prezidenti Volodimir Zelenskiy Milliy xavfsizlik va mudofaa kengashining rossiyaparast arboblar va jurnalistlarga qarshi sanksiyalar haqidagi qarorini kuchga kiritdi. Tegishli farmon 11 aprel, juma kuni Ukraina davlati rahbari saytida e’lon qilindi.

Farmonga ko‘ra, sanksiya ro‘yxatiga 18 ta ommaviy axborot vositasi va 71 nafar jismoniy shaxs – ham rossiyalik, ham ukrainaliklar kiritilgan. Ular orasida «Rossiya 1» telekanali muxbiri Aleksandr Sladkov, jurnalist Arina Sharapova va Quest Pistols, «Griby» guruhlari, qo‘shiqchi Luna bilan ishlagan musiqiy prodyuser Yuriy Bardash bor.

Ukraina prezidentining saytida e’lon qilingan yana bir farmonda Rossiya «soyadagi floti» va uning faoliyatiga aloqador shaxslarga nisbatan sanksiyalar joriy etilgan. Cheklovlar 59 kishiga, jumladan, Rossiya Federatsiyasi va Xitoy fuqarolariga tegishli.

Sanksiyalar, xususan, Ukraina yurisdiksiyasidagi aktivlarni muzlatish, kapitalni eksport qilishni taqiqlash va agar mavjud bo‘lsa, davlat mukofotlaridan mahrum etishni o‘z ichiga oladi.

«Yangi sanksiyalar qadamlari. Biz urush targ‘ibotchilariga va Rossiyani oqlayotganlarga bosimni kuchaytirmoqdamiz va hamkorlarimiz bilan birgalikda Rossiya «soyadagi floti» faoliyatiga to‘sqinlik qilmoqdamiz. Tegishli farmonlar allaqachon saytda», — deb yozdi Zelenskiy Telegram-kanalida. Uning qo‘shimcha qilishicha, Milliy xavfsizlik va mudofaa kengashining mansabdor shaxslarga nisbatan sanksiyalar bo‘yicha yana bir qarori tayyorlanmoqda, u yaqin kelajakda e’lon qilinadi.