Rossiyada ijaraga berilgan kvartiradan to‘rt nafar o‘zbekistonlikning jasadi topildi

Rossiyaning Kaliningrad shahrida joylashgan ko‘p qavatli uylarning biridan to‘rt nafar o‘zbekistonlikning jasadi topildi. Tergovchilar ularning o‘limida jinoyat alomatlari aniqlamagan.

Qayd etilishicha, Gagarin ko‘chasidagi 22-uydagi xonadon salkam bir oy oldin ijaraga berilgan — u yerga to‘rt nafar erkak ko‘chib o‘tgan. Ular Kaliningradga O‘zbekistondan ishlash uchun borgan.

Qo‘shnilar vafot etgan shaxslar haqida ijobiy fikr bildirgan, ko‘p ishlab, uyga kam kelishganini ta’kidlagan.

«Yaxshi odamlar edi. Har kuni ertalab soat sakkiz yarimlarda chiqib ketardi, kechqurun ham soat to‘qqizlar atrofda qaytib kelardi. Faqat eshik yopilish ovozini eshitardim, o‘zi juda osoyishta edi», — deya eslaydi Lyudmila ismli ayol.

Dastlabki taxminlarga ko‘ra, ularning o‘limiga is gazidan zaharlanish sabab bo‘lgan. Oblast tergov qo‘mitasining versiyasi bo‘yicha, ijaradagi kvartirada gaz jihozlariga noto‘g‘ri xizmat ko‘rsatilgan bo‘lgan.

«Jinoyat ishi tergovi oblast prokuraturasi nazoratida. Ularning o‘limida kvartira egasi javobgar bo‘lishi mumkin. «Ehtiyotsizlik oqibatida o‘limga sabab bo‘lish» moddasi bo‘yicha ochilgan jinoyat ishi doirasida maksimal jazo — 4 yilgacha ozodlikdan mahrum qilishni nazarda tutadi», — deydi Rossiya Tergov qo‘mitasi rahbarining Kaliningrad oblasti bo‘yicha katta yordamchisi Natalya Gatsko.