Tramp 1 avgustdan Janubiy Koreya va Yaponiya tovarlariga 25 foizli bojlar joriy etilishini e’lon qildi

AQSh prezidenti Donald Tramp 1 avgustdan Yaponiya va Janubiy Koreya tovarlariga 25 foizli boj joriy etilishini e’lon qildi. U o‘zining Truth Social ijtimoiy tarmog‘iga Janubiy Koreya prezidenti Li Chje Myon va Yaponiya bosh vaziri Sigeru Isibaga yo‘llangan ikkita rasmiy xatni joylashtirdi.

«2025 yil 1 avgustdan boshlab biz barcha sohalarga aloqador tariflardan tashqari, Qo‘shma Shtatlarga kirib keladigan har qanday yapon tovarlariga 25 foizli tariflarni joriy etamiz», — deyiladi Oq uyning Yaponiya bosh vaziriga yo‘llagan xatda.

Janubiy Koreya prezidentiga yo‘llangan maktubda ham shu haqda so‘z boradi. «Yuqoriroq tariflardan qochish maqsadida tranzit orqali yuborilgan tovarlar ham ushbu oshirilgan bojlarga tortiladi», — deya qo‘shimcha qilinadi xatida.

Tramp oshirilgan import bojlari joriy etilishi to‘g‘risida aprel boshlarida e’lon qilgandi, ammo keyinroq buni 90 kunga kechiktirdi. Ushbu muddat 9 iyul kuni yakunlanadi. O‘tgan muddat davomida AQSh Vetnam, Xitoy va Buyuk Britaniya bilan savdo bitimlarini imzoladi.

Eslatib o‘tamiz, iyun oxirlarida Donald Tramp Truth Social ijtimoiy tarmog‘iga «Kanada bilan barcha savdo muhokamalarini» to‘xtatishini va ushbu qaror zudlik bilan kuchga kirishini ma’lum qilgandi.