Turkiya transport vaziri tezlikni me’yordan oshirgani uchun jarima to‘ladi

Vazir 140 km/soatgacha ruxsat berilgan joyda avtomobil tezligini 225 km/soatgacha olib chiqqan va buning videosini ijtimoiy tarmoqqa joylagan. Tanqidlardan keyin, u o‘z ixtiyori bilan jarima to‘laganini ma’lum qildi.

Foto: Ege Politik

Turkiya transport vaziri Abdulqodir O‘rolo‘g‘li transport vositasini boshqarayotganida tezlikni me’yordan oshirdi. Holat ijtimoiy tarmoqlarda muhokamalarga sabab bo‘lgach, o‘z ixtiyori bilan politsiyaga murojaat qilib, jarima to‘laganini aytdi.

Dastlab O‘rolo‘g‘li X ijtimoiy tarmog‘ida Anqara-Nig‘de trassasi bo‘ylab safarining videosini e’lon qildi, unda avtomobil tezligi 225 km/soatga yetgani ko‘rinadi. Qonun bo‘yicha trassada belgilangan tezlik cheklovi 140 km/soatni tashkil qiladi.

Videolavha OAV va ijtimoiy tarmoqlarda tezda tarqalib, yo‘l harakati xavfsizligi uchun mas’ul bo‘lgan amaldorning bunday xatti-harakati ko‘plab tanqidlarga sabab bo‘ldi.

Ertasi kuni vazir jarima to‘lagani haqidagi bayonnoma suratini ulashdi.

O‘rolo‘g‘li so‘zlariga ko‘ra, u shaxsan politsiyaga murojaat qilib, qoidabuzarlikni tan olgan. Oxir-oqibat 9267 lira (230 dollar) miqdorida jarimaga tortilgan.

O‘rolo‘g‘li qonun barcha uchun, jumladan, vazirlar uchun ham bir xil ekanini ta’kidladi.