Rossiyada migratsiya siyosatining yangi tamoyili e’lon qilindi: «keldi – pul ishladi – ketdi»

Rossiya migratsiya siyosatini yanada qat’iylashtirmoqchi. «Biz migratsiyaga «keldi – pul ishladi - ketdi» tamoyili bo‘yicha yondashamiz», deb ma’lum qildi Rossiya iqtisodiy rivojlanish vaziri Maksim Reshetnikov.

Sentyabr oyida Davlat Dumasiga mehnat migrantlariga oila a’zolarini Rossiyaga olib kelishni taqiqlovchi qonun loyihasi kiritildi.

«Hammasi kundek ravshan - odamlar boshqa mamlakatlardan keladi, pul topadi, pul oladi, ketadi. Bizga bu yerda oilalar kerak emas, biz o‘z mamlakatimiz fuqarosi bo‘lmaganlarni o‘qitishga majbur emasmiz... Bu jarayon to‘g‘rilanmoqda. Migratsiyaga, menimcha, hech kim uzoq muddatga tayanishga tayyor emas», dedi Reshetnikov.

Rossiyada migrantlarga nisbatan munosabat 2024 yil mart oyida «Krokus Siti Xoll»da sodir etilgan teraktdan so‘ng keskin yomonlashdi. Hukumat ularning huquqlarini cheklovchi qonunlarni bosqichma-bosqich qabul qilmoqda. Rasmiylar iqtisodiyot migrantlarsiz ishlay olmasligini tan oladi, ammo ayni paytda ular uchun shartlarni kuchaytirmoqda.

Migrantlar oila a’zolarining Rossiyaga kirishiga taqiq qo‘yilishi rasman ijtimoiy infratuzilmaga yuk bilan izohlanmoqda.

«Migrantlarni jalb qilish kerak albatta, lekin biz boshlagan jarayonni yakunlashimiz lozim», deb xulosa qildi Reshetnikov.