“Kuniga 700-800 ming suv ishlab chiqarsak ham yetmayapti” – “Chortoq” buyurtmalarni qoplab ulgurmayapti 

Kun.uz Business “Chortoq” ishlab chiqarish zavodida bo‘lib, texnik direktor bilan suhbatlashdi. Kompaniya yiliga 50 mlrd so‘mdan oshiq soliq to‘lamoqda, kuniga 700-800 ming, yiliga 80-100 mln dona suv ishlab chiqarilyapti. “Chortoq” allaqachon AQShdan Koreyagacha bo‘lgan makonda mijozlarini topgan. 

Xo‘sh, qanday qilib oddiy suvdan bunday biznes qilish mumkin?

{Yii::t(}

O'tkazib yuborish 6s

O'tkazib yuborish

“Chortoq” suvi aslida sobiq sovet ittifoqi davrida chiqarilgan “Namangan” suvi bilan bir xil. Faqat ittifoq tarqagandan keyin suv ishlab chiqarish ham to‘xtagan. Oradan ancha yillar o‘tib esa “Chortoq” nomi bilan mahsulot qayta bozorda o‘z o‘rnini topdi. 

Suv Namangan viloyatining Chortoq tumanidan chiqadi, tabiiy va shifobaxsh. Biznesning asosini – tabiiy suvning borligi fakti tashkil qilmoqda. Faqat sifatli uskunalar va tizim yaratildi, jamoa shakllantirildi. 

Bugun suv ishlab chiqarish uchun ikki katta zavod ishlamoqda, soatiga 24-30 ming, kuniga 700-800 ming, yiliga esa 80-100 million dona “Chortoq” chiqariladi. Mahsulotni vokzallar, aeroportlardan tortib yuqori martabali mehmonlar dasturxonidan ham topasiz. 

Kompaniya texnik direktoriga ko‘ra, zavod bor buyurtmalarni to‘liq qoplashga ulgurmayapti. Shuning uchun yaqin fursatda yana 3-liniya ham ishga tushishi kerak. Uskunalar – Fransiya, Italiya va Germaniyadan olib kelingan. 

Mahsulot ishlab chiqaruvchilarga ko‘ra, “Chortoq”ning yutug‘i – uning ta’mi hamda tabiiyligida. Aslida quduqdan chiqadigan suvning hidi va rangi boshqacha bo‘ladi, ishlov berishda ular o‘zgartiriladi. Lekin suvning tarkibi mutlaqo o‘zgartirilmaydi. Kompaniya tabiiylikni prioritet qilib olgan. 

Biznes asoschilariga ko‘ra, ishbilarmonlikda asosiy narsa – halollik. Halollik bor joyda – baraka bo‘ladi. “Chortoq” 4,5 mln dollar investitsiya bilan boshlangan, ikkinchi zavodga esa 20 mln dollar tikilgan. Lekin shunday holatlar ham bo‘lganki, ishlab chiqaruvchilar qarz olishga ham majbur bo‘lishgan. 

“Qarz qachon olinadi, qachonki o‘sha pul aniq maqsad uchun sarflanishi va rostdan ham ortiga qaytishiga ishonilgan paytda”, deydi “Chortoq” texnik direktori.