Rossiyaning katta shaharlarida metroga kirishda smartfonlarni tekshirish boshlandi

Yekaterinburg va Sankt-Peterburgda allaqachon kuchga kirgan yangi qoidalar telefonlar, kompyuterlar va boshqa texnikalarning sozligini tasdiqlash uchun ularni yoqishni talab qiladi.

«Yangilikdan maqsad - terrorizmga qarshi himoyani kuchaytirish, chunki qurilmalar portlovchi qurilma sifatida ishlatilishi mumkin, korpusda esa portlovchi yoki tashish taqiqlangan moddalarni olib o‘tish mumkin», deb xabar berdi Yekaterinburg metropoliteni matbuot xizmati. Ta’kidlanishicha, bunda qurilmalarning ichi, kontenti hozircha tekshirilmaydi.

«NeMoskva» nashrining qayd etishicha, ijtimoiy tarmoqlarda Yekaterinburg aholisi yangi qoidalardan faol shikoyat qilmoqda. Foydalanuvchilar paradoksal holatga ishora qilmoqda: agar telefon quvvati tugagan bo‘lsa, odam nafaqat metrodan foydalana olmaydi, balki taksi chaqira olmaydi yoki yaqinlaridan uni olib ketishni so‘ray olmaydi. «Agar notanish odamning telefonidan qo‘ng‘iroq qilishni so‘rasangiz, telefonni berganlik uchun jinoiy javobgarlikka tortiladi. Ajoyib», deb izoh qoldirgan foydalanuvchilardan biri.

Xuddi shunday chora-tadbirlar Peterburg metrosida avgust oyidayoq joriy etilgan edi. U yerda elektron qurilmalari bo‘lgan yo‘lovchilardan ham tekshirish uchun ularni yoqish so‘ralmoqda. Shu bilan birga, Sankt-Peterburg metrosida mahalliy qonunchilikka ko‘ra, maxsus ruxsatnomasiz quvvatlantirish rozetkalaridan foydalanish taqiqlangan, bu esa o‘chib qolgan gadjet egalari uchun qo‘shimcha muammo tug‘dirdi.

Boshqa katta shaharlar metropolitenlarida bunday tekshiruvlar joriy etilishi haqida hozircha xabar berilmagan.

Yangi qoidalar uchun Transport vazirligining 2025 yil 4 fevraldagi 34-sonli federal buyrug‘i asos bo‘ldi, unda texnikani nafaqat skanerlar yordamida, balki majburiy yoqish orqali ham tekshirish belgilangan. Ilgari bunday protsedura mumkin edi, endi esa majburiy bo‘ldi. Rossiya aeroportlarida Rossiya Havo kodeksiga muvofiq shunga o‘xshash normalar uzoq vaqtdan beri amal qiladi.