Urganch aeroportini modernizatsiya qilish va boshqarish bo‘yicha bitim imzolandi

2025 yil 15 oktyabr kuni Toshkent shahrida «Uzbekistan Airports», Urganch xalqaro aeroporti va «Incheon International Airport Corporation» (Janubiy Koreya) tomonidan Urganch xalqaro aeroportini modernizatsiya qilish va boshqarish bo‘yicha davlat-xususiy sheriklik shartnomasi imzolandi. Ushbu shartnoma shu yil o‘tkazilgan tenderning davomi hisoblanadi.

Hujjatlarni imzolash marosimida «Uzbekistan Airports» kompaniyasi boshqaruvi raisi Javlonbek Umarxodjayev, «Incheon International Airport Corporation» prezidenti Li Xak-Chjye va Urganch xalqaro aeroporti direktori Oybek Matkarimov ishtirok etdi. Tadbir O‘zbekiston transport vaziri Ilhom Maxkamov boshchiligida o‘tkazildi.

«Inchxon xalqaro aeroporti korporatsiyasi bilan hamkorlik O‘zbekiston aeroportlari infratuzilmasi rivojida yangi sahifa ochmoqda. Janubiy koreyalik hamkasblarimizning dunyoning eng yaxshi aeroportlaridan birini boshqarish bo‘yicha tajribasi ilg‘or texnologiyalarni joriy etish, yo‘lovchilarga xizmat ko‘rsatish sifatini oshirish va mamlakatimizning tranzit salohiyatini mustahkamlash uchun zamin yaratadi», dedi Javlonbek Umarxodjayev.

Davlat-xususiy sheriklik to‘g‘risidagi bitim aeroportni modernizatsiya qilish va boshqarish loyihasini birgalikda amalga oshirishni nazarda tutadi. Xususiy sherik yo‘lovchi va yuk terminallarini qurish va boshqarish, shu jumladan yerda xizmat ko‘rsatish uchun javobgar bo‘ladi. Davlat sherigi tomonidan aerodrom majmuasini (uchish va qo‘nish yo‘lagi va perron) qurish va boshqarish uchun javobgarlik nazarda tutilgan.

Eslatib o‘tamiz, 2024 yil 1 avgust kuni «Qurilish, boshqarish va topshirish» (BOT) modeli asosida «Urganch xalqaro aeroportini modernizatsiya qilish va boshqarish» bo‘yicha tender e’lon qilingan edi. Loyiha «Uzbekistan Airports» AJ tomonidan O‘zbekiston Transport hamda Iqtisodiyot va moliya vazirliklari hamkorligida amalga oshirilmoqda.

Joriy yil aprel oyida tenderning barcha bosqichlari yakunlandi va Inchxon aeroporti (Seul, Janubiy Koreya) boshqaruvchisi bo‘lgan «Incheon International Airport Corporation» g‘olib deb e’lon qilindi. Inchxon xalqaro aeroporti Janubiy Koreyaning asosiy aeroporti va Shimoliy-Sharqiy Osiyodagi eng yirik transport markazlaridan biri bo‘lib, u bir necha bor eng rivojlangan va gavjum aeroportlar o‘ntaligiga kirgan. 2024 yil holatiga ko‘ra Inchxon aeroporti 80 milliondan ortiq yo‘lovchiga xizmat ko‘rsatgan.