Suv yetkazib berish xizmatlari faoliyatiga qo‘shimcha vakolatlar berilmoqda

“Quyi bo‘g‘inda suv resurslarini boshqarish tizimini yanada takomillashtirish hamda sohaning xususiy sektor uchun jozibadorligini oshirish chora-tadbirlari to‘g‘risida”gi prezident qarori qabul qilindi.

Foto: O‘zA

Qarorni qabul qilishdan ko‘zlangan asosiy maqsadli ko‘rsatkichlar etib quyidagilar belgilandi, jumladan:

🔹 160 ta “Suv yetkazib berish xizmati” davlat muassasalarining moliyaviy mustaqilligini oshirish, ularda shtatlarni egiluvchan boshqarish tizimini joriy qilish hamda moddiy-texnik bazasini mustahkamlash;
🔹 Jizzax, Qashqadaryo, Navoiy, Namangan, Samarqand va Sirdaryo viloyatlaridagi nasos stansiyalarining 50 foizini 2026 yilda davlat-xususiy sheriklik asosida boshqaruvga berish;
🔹 “Suvchilar maktabi” loyihasi doirasida 141 ta tumanda kamida 3,5 ming gektar yer maydonida o‘quv dala-shiyponlarini tashkil etish.

Suv yetkazib berish xizmatlari faoliyati samaradorligini oshirish maqsadida, ularga quyidagi qo‘shimcha vakolatlar berildi, jumladan:

▪️ moliyaviy holatdan kelib chiqib hamda mavsumga qarab mustaqil ravishda shtat birliklari sonini belgilash;
▪️ suv resurslaridan foydalanganlik uchun soliqdan davlat budjetiga tushgan tushumning 40 foizi miqdoridagi mablag‘lar hisobidan moddiy-texnik bazani mustahkamlash.

Kooperativ tashkil etilgandan so‘ng yangi hisobot yilidan boshlab “Do‘stlik tumani suv yetkazib berish xizmati” davlat muassasasining vazifa va funksiyalari kooperativga o‘tkaziladi.