GFR rossiyaliklarning biometrik bo‘lmagan pasportlar bilan kirishini taqiqlaydi

2026 yil 1 yanvardan boshlab Rossiya fuqarolariga Germaniyaga kirish vizasini olish uchun biometrik xorijga chiqish pasport talab etiladi, deb xabar berildi 5 noyabr kuni GFRning Rossiyadagi vakolatxonalari saytida. RFning biometrik bo‘lmagan xorijiy pasportlaridan foydalanish faqat ularda amaldagi Germaniya vizasi mavjud bo‘lgan hollardagina mumkin bo‘ladi.

Shu bilan birga, joriy yilning 31 dekabrigacha Germaniyaning xorijdagi vakolatxonalari rossiyalik biometrik bo‘lmagan pasport egalarini ham viza bilan ta’minlashda davom etadi va bunday vizalar Germaniyaga kirish va bo‘lib turish uchun qo‘shimcha hujjatlarsiz qo‘llanishi mumkin, deyiladi keyingi xabarda. “Agar siz vizaga ariza bergan bo‘lsangiz va u 2025 yil 31 dekabrgacha ko‘rib chiqilmagan bo‘lsa, vizani olish uchun qo‘shimcha tarzda Rossiyaning biometrik xorijga chiqish pasportini taqdim etishingiz kerak bo‘ladi”, — deb ma’lum qildi GFR elchixonasi.

2026 yil 1 yanvardan boshlab Germaniyaga yangi viza uchun ariza topshirish yoki oldin berilgan ruxsatnomani uzaytirish faqat RF biometrik pasportini taqdim etgan holda mumkin bo‘ladi. Shuningdek, Germaniyaga sayohat qilish rejalashtirilgan bo‘lsa, boshqa shengen mamlakatlari vakolatxonalarida viza rasmiylashtirishda ham xuddi shu qoidalar amal qiladi, deb qo‘shimcha qildi Germaniya elchixonasi.

Biometrik pasportda hujjat egasining shaxsiy ma’lumotlari, jumladan, surat va barmoq izlari saqlanuvchi elektron chip mavjud. Uning amal qilish muddati — biometrik bo‘lmagan pasportlardagi 5 yil o‘rniga 10 yil. Bundan tashqari, u yangi hujjat standartlarini tan olgan mamlakatlarga vizasiz yoki soddalashtirilgan tartibda kirish imkoniyatlarini kengroq yaratadi.

Germaniya rasmiylari biometrik bo‘lmagan xorijga chiqish pasportiga ega va Germaniyaga safar qilmoqchi bo‘lgan rossiyaliklarni biometrik hujjat rasmiylashtirishga chaqirdi. “Germaniya vizasini berish bo‘yicha mazmunan talablar o‘zgarishsiz qoladi”, — deb qo‘shimcha qildi GFR elchixonasi.

Shu kabi qarorlarni avvalroq Daniya, Chexiya, Fransiya, Estoniya, Latviya, Litva, shuningdek Shengen hududiga kiruvchi Islandiya ham qabul qilgan edi.