Qishloq xo‘jaligi yerlari normativ qiymatini aniqlash tartibi tasdiqlandi

Hukumat qarori (744-son, 26.11.2025 y.) bilan “Qishloq xo‘jaligiga mo‘ljallangan yerlarning normativ qiymatini aniqlash tartibi to‘g‘risida”gi nizom tasdiqlandi.

Nizomga muvofiq, qishloq xo‘jaligiga mo‘ljallangan yerlarning normativ qiymati quyidagilarni hisobga olgan holda aniqlanadi:

• belgilangan normativ ko‘rsatkichlar;
• yer kadastri ma’lumotlari;
• ekilgan qishloq xo‘jaligi ekinlari tuzilmasi;
• tuproqning bonitet balli.

Hisob-kitoblar foyda va rentabellikka asoslangan daromadli yondashuv orqali amalga oshiriladi.

Qishloq xo‘jaligi tovar ishlab chiqaruvchilarining qishloq xo‘jaligiga mo‘ljallangan yerlari normativ qiymatni aniqlash obekti hisoblanadi.

Normativ qiymatni aniqlash:

• Qishloq xo‘jaligi vazirligining “O‘zdaverloyiha” davlat ilmiy-loyihalash instituti tomonidan amalga oshiriladi;
• natijalari davlat yer kadastriga kiritiladi.

Har bir qishloq xo‘jaligi tovar ishlab chiqaruvchisi bo‘yicha qishloq xo‘jaligi ekin maydonlari va boshqa baholangan yerlarning normativ qiymati to‘g‘risida ma’lumotnoma tuziladi.

Ushbu ma’lumotnoma:

• qishloq xo‘jaligi tovar ishlab chiqaruvchisiga topshirish uchun
• “Elektron hukumat” tizimi orqali Soliq qo‘mitasiga yuboriladi.

Normativ qiymatning hisob-kitobi natijalari ming so‘mgacha bo‘lgan aniqlikda taqdim etilishi belgilangan.