Mirzacho‘lda cho‘l sharoitida paxtachilik bo‘yicha innovatsion maktab tashkil etiladi

Prezident Shavkat Mirziyoyev ta’kidlaganidek, «Mirzacho‘l» klasteri shu yilning o‘zida cho‘l sharoitida paxtadan har gektardan 50–55 sentnerdan hosil oldi. Unga biriktirilgan 27 nafar fermer esa hosildorlikni 85 sentnergacha yetkazishga muvaffaq bo‘ldi.

Yaratilayotgan innovatsion maktabda o‘qib, maxsus sertifikat olgan fermerlarga yangi joriy etilayotgan reyting tizimida qo‘shimcha 10 ball berilishi belgilangan. Bu esa ularga imtiyozli kreditlar va boshqa qo‘llab-quvvatlash choralaridan kengroq foydalanish imkonini yaratadi.

Shu bilan birga, ilg‘or fermerlarning tajribasini ommalashtirish maqsadida ustoz-shogird tizimi yo‘lga qo‘yiladi. Unga ko‘ra, yuqori natija ko‘rsatayotgan fermerlar kam hosil olayotgan fermerlarga biriktiriladi. Agar ustoz fermer o‘z shogirdiga tajribasini o‘rgatib, uning dalasida hosildorlikni gektariga 50 sentnerdan oshirishga erishsa, 5 million so‘m miqdorida mukofot oladi.

Mazkur chora-tadbirlar cho‘l va suv tanqis hududlarda ham yuqori hosildorlikka erishish, zamonaviy agrotexnologiyalarni ommalashtirish va fermerlar o‘rtasida samarali hamkorlikni kuchaytirishga qaratilgan.