4 ta neft bazasi rahbarlari lavozimidan ozod etildi

“O‘zbekneftgaz” AJ boshqaruv raisi Abdug‘ani Sanginov o‘tkazgan tanqidiy yig‘ilishda yo‘l qo‘yilgan jiddiy kamchiliklar sabab Termiz, Jizzax, Maroqand hamda Kuchlik neft bazalari rahbarlari egallab turgan lavozimlaridan ozod etildi.

Foto: O‘zbekneftgaz

Rasmiy ma’lumotga ko‘ra, yig‘ilishda neft bazalari rahbarlari va mas’ul xodimlar ishtirok etgan.

Unda neft bazalari faoliyatini sog‘lomlashtirish, moliyaviy-intizomiy holatni yaxshilash, soliq yukini optimallashtirish, ishchi-xizmatchilar uchun munosib mehnat sharoitlari yaratish hamda o‘rtacha ish haqini oshirish masalalari muhokama qilingan.

Shuningdek, yig‘ilishda aholiga halollik, poklik va ochiqlik tamoyillari asosida xizmat ko‘rsatish, sifatli neft mahsulotlarini o‘z vaqtida yetkazib berish ustuvor vazifalardan biri ekani ta’kidlangan.