GUR: Rossiya ilk bor Ukrainaga “Geran-5” hujumkor dronlari bilan hujum qildi

2026 yil boshida Ukrainaga qarshi qo‘shma havo hujumlari paytida Rossiya armiyasi ilk bor uzunligi taxminan 6 metr, qanot yoyilishi 5,5 metrgacha bo‘lgan yangi “Geran-5” zarbali dronini qo‘lladi. Bu haqda Ukraina Mudofaa vazirligi Bosh razvedka boshqarmasi yakshanba, 11 yanvar kuni xabar berdi. Idora qo‘shimcha qilishicha, ushbu dronning jangovar qismi og‘irligi taxminan 90 kg, ko‘rsatilgan zarba masofasi esa ming kilometr atrofida.

Razvedka materiallarida qayd etilishicha, mazkur dron “Geran” liniyasidagi oldingi modifikatsiyalardan farqli ravishda “oddiy aerodinamik sxema” asosida ishlangan, biroq asosiy muhim uzellar va komponentlarning katta qismi ushbu seriyaning boshqa namunalari bilan birxillashtirilgan (unifikatsiya qilingan). Xususan, yangi hujumkor dronga Raspberry mikrokompyuteri va 3G/4G-modemlar asosidagi “Kometa” nomli 12-kanalli sun’iy yo‘ldosh navigatsiya tizimi, shuningdek “Geran-3”da qo‘llanganiga o‘xshash, ammo kattaroq tortish kuchiga ega Telefly reaktiv dvigateli o‘rnatilgani aytilgan.

“Avvalgi ‘Geran’lar holatida bo‘lgani kabi, bu dronni ham Rossiya Federatsiyasining o‘z ishlanmasi deb hisoblash qiyin. Eronning Karrar droni bilan sezilarli konstruktiv va texnologik o‘xshashlik qayd etildi”, — dedi GUR.

Ukraina razvedkasidagi ma’lumotlarga ko‘ra, RF “Geran-5”ni aviatsiya tashuvchilaridan — xususan Su-25 samolyotlaridan ishga tushirish variantlarini ham ishlab chiqmoqda: bu parvoz masofasini oshirish va qo‘llashni arzonlashtirishga xizmat qilishi mumkin. Shuningdek, apparatni Ukraina aviatsiyasiga qarshi kurashish maqsadida “havo-havo” turidagi raketalar bilan jihozlash imkoniyati ham ko‘rib chiqilayotgani aytilgan.

“GUR mutaxassislari dushman qo‘llagan namunalarni har tomonlama o‘rganishni boshladi. Konstruksiya, tarkibiy qismlar va elektron komponent bazasi bo‘yicha batafsil tahlil yaqin vaqt ichida War&Sanctions portalidagi ‘Zarba vositalari’ bo‘limida e’lon qilinadi”, — deyiladi idora xabarnomasida. “Geran-5” qachon va qayerda qo‘llangani hozircha aniq aytilmagan.

Ukraina QK Havo kuchlarining kundalik ma’lumotlarida asosan Eronda ishlab chiqarilgan Shahed dronlari hamda “Gerbera” dronlari qo‘llangan Rossiya hujumlari tilga olinadi. “Geran” dronlari esa Rossiyaning Ukrainaga qarshi urushi boshlanganidan beri faqat bir necha marta esga olingan. Birinchi marta bu 2022 yil 20 sentabrda sodir bo‘lgan: o‘shanda Mikolayiv viloyatida “dushmanning Eronda ishlab chiqarilgan Shahed-136 kamikadze-droni, Rossiya harbiylari uni ‘Geran-2’ deb belgilaydi”, urib tushirilgan. O‘shanda u 50 kg jangovar qismga ega, uzunligi 3,5 m, qanot yoyilishi 2,5 metr bo‘lgan qurilma ekani aytilgan.

Der Spiegel jurnali dekabr oxirida harbiy tahlilchilarga tayanib, Rossiya Ukrainaga qarshi urushida yangi kamikadze-dronni qo‘llayotgani, u Eronning Shahed dronining texnologik jihatdan soddalashtirilgan va ishlab chiqarishga arzonroq modifikatsiyasi ekanini xabar qilgan edi. Gap 2025 yilda Eron taqdim etgan Shahed-107 modeli haqida ketgan. Xalqaro strategik tadqiqotlar instituti (IISS) dronlar bo‘yicha eksperti Fabian Xins aytishicha, bunday dronning parvoz masofasi qisqaroq (taxminan 1400 km) va yengillashtirilgan portlovchi jangovar qismga ega.

Materialda qayd etilishicha, “Geran-2” dronlari RFda Eron texnologiyasi asosida ommaviy ishlab chiqarilmoqda. Rossiya armiyasi bunday dronlarni “to‘da hujumlari”da qo‘llaydi: o‘nlab dronlarni uchirish Ukrainaga arzon nishonlarga qarshi qimmat va tanqis zenit raketalarini sarflashga majbur qiladi hamda HHM tizimlarini ballistik raketalardan chalg‘itadi. Ekspert fikricha, yangi turdagi drondan foydalanish Rossiyaning urush xarajatlarini optimallashtirishga intilayotganidan dalolat berishi mumkin.

Ukraina razvedkasi ma’lumotlariga ko‘ra, “Geran-2” turidagi bitta dronning tannarxi taxminan 60 ming AQSh dollari (taxminan 52 ming yevro). Shahed-107 esa Xitoy butlovchi buyumlari hisobiga ancha arzon va ishlab chiqarish tezroq ekani aytilgan.