Siyosatchi Dunsova Rossiyada erkin internet uchun «uyda norozilik» uyushtirishni taklif qildi

Jurnalist va siyosatchi Yekaterina Dunsova Rossiyada erkin internet uchun «uyda norozilik»ni tashkil etish niyatini e’lon qildi.

Dunsova o‘zining telegram kanalida yozishicha, rasmiylar so‘nggi paytlarda ko‘cha noroziligining deyarli har qanday shaklini taqiqlamoqda, shuning uchun u odamlarni ko‘chaga chiqarmasdan noroziligini bildirmoqchi.

«Butun hafta davomida soat 8 da derazalarni ochib, erkin internet uchun shovqin-suron ko‘tarish - hushtak chalish, kastryulkalarni taqillatish, musiqani yoqish, har qanday xavfsiz usulda va ruxsat etilgan shovqin darajasi doirasida», deb yozdi siyosatchi.

Dunsovaning ta’kidlashicha, bunday norozilik rasman taqiqlanmagan, ammo «barchamiz bugungi kunda qonun qanchalik moslashuvchan talqin qilinayotganini tushunamiz».

Shu munosabat bilan u Rossiya prezidenti Vladimir Putin, Davlat dumasi spikeri Vyacheslav Volodin, Federatsiya kengashi rahbari Valentina Matviyenko, Tergov qo‘mitasi raisi Aleksandr Bastrikin, ichki ishlar vaziri Vladimir Kolokolsev va bosh prokuror Aleksandr Gusanga murojaat yo‘lladi. U barcha xohlovchilarni shunday savol bilan hokimiyat vakillariga murojaat qilishga chaqirdi.

Yekaterina Dunsova - jurnalist va Rjyev shahri dumasining sobiq deputati. 2024 yilda u Rossiya prezidenti saylovida ishtirok etishni rejalashtirgan edi, biroq Markaziy saylov komissiyasi uni ro‘yxatdan o‘tkazishni rad etdi. Shundan so‘ng, u o‘zining «Tong» siyosiy partiyasini tuzishga harakat qildi, biroq Rossiya Adliya vazirligi uni ro‘yxatdan o‘tkazishdan bosh tortdi.

2024 yil may oyida (prezidentlik saylovidan ikki oy o‘tgach) Rossiya hukumati Dunsovani «chet el agenti» deb e’lon qildi.