Rossiyada migrantlar uchun davlat bojlari 12 barobar oshishi kutilmoqda

Rossiyada migrantlar uchun davlat bojlari miqdori 10-12 barobar oshishi mumkin. 27 aprel kuni Rossiya hukumati Moliya vazirligining tegishli qonun loyihasini ma’qulladi. Narxlarning oshishi kirish, yashash guvohnomasi va fuqarolikni olish uchun taklifnomalarni rasmiylashtirishga ta’sir qiladi.

Bundan tashqari, yashash guvohnomasini almashtirish, shuningdek yo‘qolgan yoki yaroqsiz holga kelgan taqdirda yangi hujjat berish uchun yangi bojlar joriy etilmoqda.

Shunday qilib, chet elliklar va fuqaroligi bo‘lmagan shaxslar uchun yashash guvohnomasini olish uchun boj 6 mingdan 30 ming rublgacha, ya’ni 400 foizga oshadi, deb yozdi «Izvestiya».

Tuzatishlarga ko‘ra, Rossiya fuqaroligini olish va undan chiqish uchun boj 4,2 ming rubldan 50 ming rublgacha oshadi. Kirish uchun taklifnoma narxi 960 rubldan 8 ming rublgacha, oddiy viza narxi 1,2 mingdan 2 ming rublgacha, ko‘p martalik viza narxi 1,92 mingdan 6 ming rublgacha oshadi.

Vaqtinchalik yashash ruxsatnomasi 1,92 mingdan 15 ming rublgacha, yashash guvohnomasi esa 6 mingdan 30 ming rublgacha qimmatlashishi mumkin.

Xorijiy talabalar uchun vaqtinchalik yashash joyini rasmiylashtirish avvalgi 1,92 ming rubl o‘rniga 8 ming rublga tushadi.

Shuningdek, xorijiy ishchilarni jalb qilish uchun bojni 12 mingdan 15 ming rublgacha oshirish taklif qilinmoqda.

Yangi turdagi bojlar ham qo‘shiladi - yashash guvohnomasini almashtirish (6 ming rubl) va vaqtincha yashash uchun, shu jumladan ta’lim olish uchun ruxsatnoma dublikatini berish (5 ming rubl).

Moliyaviy-iqtisodiy asoslashga ko‘ra, migratsiya sohasidagi yangi davlat bojlarini oshirish va joriy etishdan federal budjetning kutilayotgan qo‘shimcha daromadlari hajmi 2026 yil 1 iyuldan boshlab yiliga taxminan 7,9 milliard rublni, 2027 yil 1 yanvardan esa taxminan 15,8 milliard rublni tashkil etadi, deb yozdi RBK.

Shu bilan birga, ekspertlar yig‘imlarning bunday keskin o‘sishi yashirin bandlikni oshirishi, ishchilarni yollashni qiyinlashtirishi va Rossiyaning xorijiy talabalar va mutaxassislar uchun jozibadorligini pasaytirishi mumkinligidan ogohlantirmoqda.