Xorazmda MIB xodimi pora bilan qo‘lga tushdi

Xorazm viloyatining Xiva tumanida Majburiy ijro byurosi davlat ijrochisi soliq qarzdorligini bartaraf qilib berish evaziga 1500 AQSh dollari olgan vaqtida ashyoviy dalillar bilan ushlandi.

Davlat xavfsizlik xizmati xodimlari tomonidan o‘tkazilgan tezkor tadbirda Majburiy ijro byurosining Xiva tuman bo‘limi davlat ijrochisi qonunga zid harakatlari bilan fosh etildi.

Ma’lum bo‘lishicha, u xizmat mavqeidan foydalanib, bo‘lim ish yurituvidagi ijro ishi bo‘yicha 1995 yilda tug‘ilgan fuqarodan undirilishi lozim bo‘lgan 4 million 526 ming so‘m soliq qarzdorligini, shuningdek, ushbu fuqaro va uning otasiga nisbatan hisoblangan jami 22 million 822 ming so‘mlik yer va mol-mulk soliqlarini mansabdor tanishlari orqali bartaraf qilib berishni va’da qilgan.

Evaziga esa u 1500 AQSh dollari olgan vaqtida ashyoviy dalillar bilan qo‘lga olingan.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.