Putin rossiyaliklar himoyasi uchun xorijda armiyadan foydalanishga ruxsat beruvchi qonunni imzoladi

Hujjat «Rossiya Federatsiyasi fuqaroligi to‘g‘risida»gi va «Mudofaa to‘g‘risida»gi qonunlarga o‘zgartirishlar kiritadi. Qonunga ko‘ra, prezident quyidagi idoralar tomonidan hibsga olingan, ushlangan yoki jinoiy (yoki boshqa) ta’qibga uchragan fuqarolarni himoya qilish uchun Rossiya tashqarisidagi harbiy tuzilmalardan foydalanish huquqiga ega bo‘ladi:

• Rossiya ishtirokisiz qaror chiqargan xorijiy sudlar;

• Vakolati Rossiya bilan tuzilgan xalqaro shartnomaga yoki BMT Xavfsizlik Kengashining tegishli rezolyutsiyasiga asoslanmagan xalqaro sud organlari.

Qonun nisbatan tezkor qabul qilindi: 2026 yil mart oyida hukumat tomonidan Davlat Dumasiga kiritildi, 13 may kuni Davlat Dumasi tomonidan ikkinchi va uchinchi o‘qishda qabul qilindi, 20 may kuni Federatsiya Kengashi tomonidan ma’qullandi, 25 may kuni prezident tomonidan imzolandi.

Qonun loyihasining tushuntirish xatida ta’kidlanishicha, yangi norma rossiyaliklarning chet eldagi «siyosiy sabablarga ko‘ra ta’qib qilinishdan» himoya qilishga qaratilgan.

Kreml va parlament tashabbusni vatandoshlarni himoya qilishning muhim vositasi deb atamoqda. Mamlakat ichidagi va xorijdagi tanqidchilar qonunni tashqi siyosiy bosimning qo‘shimcha vositasi va eksterritorial operatsiyalar uchun ehtimoliy huquqiy asos sifatida ko‘rmoqda.

Ekspertlarning ta’kidlashicha, amaliyotda NATO mamlakatlarida yoki kuchli xavfsizlik tizimiga ega bo‘lgan aksariyat davlatlarda armiyaning haqiqiy jangovar qo‘llanilishi ehtimoli juda kam va jiddiy xalqaro mojarolarga olib kelishi mumkin. Qonun ko‘proq ramziy va siyosiy-huquqiy xarakterga ega.

Qonun rasmiy e’lon qilingan kundan e’tiboran 10 kun o‘tgach kuchga kiradi.