Tramp Eron masalasi «hal bo‘lgach» Kubadagi rejimni o‘zgartirish rejasini e’lon qildi

Vashington Kubada siyosiy rejimni o‘zgartirishga erishmoqchi va bu bilan Eronga qarshi urush tugaganidan keyin shug‘ullanadi, dedi AQSh prezidenti Donald Tramp.

Foto: AP / Evan Vucci

«Bizning Kuba bo‘yicha juda yaxshi rejalarimiz bor. Menimcha, biz juda qattiq, juda yoqimsiz bo‘lgan rejimdan qutulishimiz kerak. Biz Eron bilan shug‘ullanamiz va bu ish yakunlangach, qaytish yo‘lida biroz to‘xtab, Kuba bilan shug‘ullanamiz. Biz ularga yordam bermoqchimiz», dedi Oq uy rahbari jurnalistlar bilan muloqot chog‘ida.

Ushbu bayonotlar fonida AQSh Moliya vazirligi Kuba rahbariyati vakillariga qarshi yangi sanksiyalar joriy etilishini e’lon qildi. Cheklovlar ostida Kuba prezidenti Migel Dias-Kanel, uning oila a’zolari, shuningdek, Kuba sobiq rahbari Raul Kastroning o‘g‘li va nabirasi Alexandro Kastro Espin va Raul Alexandro Kastro Kalis ham bor. Bundan tashqari, Kuba inqilobiy qurolli kuchlari vazirligi, Kuba xalqlari do‘stligi instituti, inqilobni himoya qilish qo‘mitalari va yana bir qator tashkilotlarga qarshi sanksiyalar joriy etildi.

Yanvar oyida Tramp AQSh hududida favqulodda holat e’lon qildi va buni Kuba tomonidan milliy xavfsizlikka tahdid bilan izohladi. Shundan so‘ng Vashington amalda orolni energetik blokadaga oldi. May oyidayoq Kuba hukumati mamlakat energetika tizimining jiddiy holati haqida xabar bergan edi. Oq uy rahbari, o‘z navbatida, Kuba rejimining yaqinlashib kelayotgan qulashi haqida bir necha bor gapirgan. Shu bilan birga, Pentagon Tramp shunday buyruq bergan taqdirda orolda harbiy operatsiyaga tayyorgarlik ko‘rishni boshlaydi, deb xabar berdi USA Today manbalari.

Kuba hukumati AQShning ehtimoliy hujumini qaytarishga tayyorligini ma’lum qildi.

«Bizning qurolli kuchlarimiz har doim tayyor va hozirda ular harbiy tajovuz ehtimoliga tayyorgarlik ko‘rmoqda», dedi Kuba tashqi ishlar vaziri Karlos Fernandes de Kossio.

Ayni paytda AQSh va Kuba muzokaralar olib bormoqda, uning davomida Vashington Havanaga respublikaning amaldagi prezidenti Dias-Kanel iste’foga chiqishi kerakligini bildirdi, deb yozadi The New York Times. Amerika tomoni uni qat’iy siyosat tarafdori va iqtisodiyotdagi zarur islohotlarga qarshi deb hisoblaydi. The Wall Street Journal ma’lumotlariga ko‘ra, AQSh ma’muriyati 2026 yil oxirigacha Kubada hokimiyatni o‘zgartirishni rejalashtirmoqda.