Луврдаги 88 млн евролик ўғрилик: яна тўрт киши ушланди

Франция полицияси Луврдаги қироллик буюмлари ўғирланганидан беш ҳафта ўтгач, яна тўрт нафар гумонланувчини ушлади. «Бу — 38 ва 39 ёшли икки эркак ҳамда 31 ва 40 ёшли икки аёл, уларнинг барчаси Париж минтақасидан», — деб маълум қилди сешанба, 25 ноябр куни Париж бош прокурори Лора Бекко.

AFP агентлиги келтирган Бекко баёнотида гумонланувчилар 19 октябр куни содир бўлган Луврдаги ўғриликда қандай рол ўйнагани батафсил очиқланмаган. Францияда сўроқ учун дастлабки қўлга олиш муддати 96 соатгача давом этиши мумкин.

29 октябрда очилган ўғирлик иши доирасида аввалроқ яна тўрт нафар қўлга олинган шахсга айб қўйилган эди. Улар орасида 35, 37 ва 39 ёшли уч эркак бор — улар музейни бевосита ўмарганликда гумон қилинмоқда. Тўртинчи қўлга олинган шахс — 38 ёшли аёл — жиноятга шерикликда айбланмоқда.

Тергов маълумотларига кўра, ўғрилар 19 октябр куни кундузи олиб қочилган юк машинасига ўрнатилган махсус зинадан фойдаланиб Луврга кирган ва кесиш ускунаси ёрдамида ойнани бузиб очган. Жиноят жойини тарк этаётганида, зинадан тушиб, скутерларга қараб қочиш чоғида ўғирланган буюмлар рўйхатидаги олтин-қимматбаҳо тошлар билан безатилган тожни йўқотиб қўйган, аммо яна саккизта бошқа экспонатни олиб қочишга муваффақ бўлган.

Ўғирланган буюмлар орасида француз малика ва императрицаларига тегишли заргарлик буюмлари ҳам бор. Йўқолган қимматбаҳо буюмларнинг умумий қиймати 88 миллион евро деб баҳоланмоқда. Ўғирланган экспонатлар ҳалигача топилгани йўқ.