O‘zbekiston | 16:04 / 03.11.2021
6375
2 daqiqa o‘qiladi

Rossiyadagi o‘zbekistonliklar milliy haydovchilik guvohnomasini qanday qilib yangisiga almashtirishi aniqlashtirildi

Hukumat qarori bilan O‘zbekistonning Rossiyadagi konsullik muassasalarida eski namunadagi milliy haydovchilik guvohnomasini yangisiga almashtirish tartibi bo‘yicha vaqtinchalik nizom tasdiqlandi.

Adliya vazirligi xabariga ko‘ra, yangi namunadagi milliy haydovchilik guvohnomasi konsullik muassasasi orqali Ichki ishlar vazirligining Yo‘l harakati xavfsizligi bosh boshqarmasi (IIV YHXBB) tomonidan rasmiylashtiriladi.

Talabgor eski namunadagi milliy haydovchilik guvohnomasini yangisiga almashtirish uchun konsullik muassasasiga ariza bilan shaxsan murojaat qiladi. Konsullik muassasasi talabgor nomidan so‘rovnomani to‘ldirib, 1 ish kunida IIV YHXBBga yuboradi. 

YHXBB taqdim etilgan ma'lumotnomani ko‘rib chiqib, 1 ish kunida yangi namunadagi milliy haydovchilik guvohnomasini rasmiylashtiradi hamda uni Tashqi ishlar vazirligi Konsullik-huquqiy departamenti (TIV KHD)ga yuboradi. Shunga ko‘ra, TIV KHD haydovchilik guvohnomasini konsullik muassasasiga diplomatik pochta orqali taqdim etadi. Konsullik muassasasi 1 ish kunida yangi namunadagi milliy haydovchilik guvohnomasini egasiga beradi yoki asoslangan sabablarga ko‘ra uni rad etadi.   

Eski namunadagi milliy haydovchilik guvohnomasi yangisiga almashtirish uchun quyidagilar undiriladi: bazaviy hisoblash miqdorining 70 foizi miqdorida to‘lov; 20 dollar miqdorida konsullik yig‘imi; 20 dollar miqdorida haqiqiy xarajatlarning o‘rnini qoplash uchun yig‘im.

Avvalroq, O‘zbekistonda 1 martdan ID-kartasi bor haydovchilar boshqa hujjatlarni ko‘rsatishi shart bo‘lmasligi xabar qilingandi.

Mavzuga oid