Jorj Kluni egizak farzandli bo‘ldi

Amerikalik aktyor Jorj Kluni va uning turmush o‘rtog‘i Amal Kluni egizakli bo‘lishdi - o‘g‘il va qiz. Bu haqida BBC News aktyorning vakili Sten Rozenfild bergan ma'lumotga asoslanib xabar berdi. 

Manbaga ko‘ra, juftlik o‘z farzandlariga Ella va Aleksandr deya ism bergan. 

"Ella, Aleksandr va Amal - ularning bari sog‘-salomat, baxtli va o‘zini yaxshi his qilmoqda", - dedi Rozenfild va tabassum bilan "Jorj o‘ziga kelgani va bir necha kundan keyin safga qaytishi"ni aytib qo‘shimcha qildi. 

Aktyorning turmush o‘rtog‘i Amal Kluni - asli livanlik bo‘lgan, Britaniyada faoliyat yurituvchi advokat. Juftlik 2014 yilda Venetsiyada nikoh to‘yini o‘tkazgan.

Ta'kidlash joizki, 2017 yilning fevralida Kluni kino olamiga qo‘shgan hissasi uchun nufuzli "Sezar" mukofotini qo‘lga kiritgan.